BJP-ko seokosa tangka jakkalsretaniko aro mikkang nitee kam ka·aniko bon·atna man·gen: Sonowal

SHILLONG: Meghalaya a·doko Bharatiya Janata Party (BJP) sorkariko rikna on·genchimosa, tangka paisa jakkalsretaniko aro mikkang nitee kam ka·aniko bon·atna man·gen ine Sombar salo, BJP-ni dilgipa aro Union Minister Sarbananda Sonowal, 10-Jirang constituency-ni BJP candidate Riya Sangma-na Ri Bhoi a·jao campaign ka·engmiting somoio parakataha.
Ia tom·bimonganio ua National People’s Party (NPP) aro Trinamool Congress dolrangkoba tangka paisa jakkalsretanina, mikkang niteanina aro kamrangko name ka·jani gimin matnange aganangaha.
“Prime Minister Narendra Modi-ni rakbee kamrangko ka·ani a·selsa da·alo India a·songni salgro salaram a·dokrang andalaoni teng·aona sokbana man·aha. Congress sorkarini somoio dakgrik dinggrikani aro kangal cha·a sianian gapachim indiba da·o salgro salaram a·dokrang, India a·songo dal·roroani gital kol gita ong·skaengaha. Meghalaya a·dokoba namroro silroroaniko ra·bana PM Modi, gisikko on·e kam ka·aha,” ine Sonowal aganaha.
Meghalaya a·doko NPP-chi dilenggipa sorkarina ma·mong sorkari bang·en dakchakanirangko on·ahachim indiba ia sorkari kamrangko chu·sokatna man·jaha ineba Union Minister matnangataha.
“Tangka paisa jakkalsretani aro mikkang nitee kam ka·ani a·selan NPP, a·dokni manderangko name nirok sandina man·jaha. Ia minggni neng·nikanirangko bon·atna gitade BJP-kosa Meghalaya a·dokna nangenga,” ine ua aganaha.
Tribal jatrangni nangnikanirangko pangnan BJP mande ra·gipa ong·a ineba Sonowal aganaha.
“Meghalaya a·dok namen pattian gapgipa a·dok ong·e nina nitogipa aro rona rotobegipa a·dok ong·a aro ia a·doko a·ningni gamrangna bang·en dongani gimin pilakni gitan tang·dona man·gipa a·dok ong·a. Ia cholrangko manderangna oe on·na gita BJP kamko ka·gen aro ian dingtang dingtang self help group (SHG)-rangnasan ong·aigija a·doko songdongenggipa pilaknan namgni ong·gen,” ine Sonowal parakataha.