TURA: North Garo Hills a·jao sub-station-ko rikna gita a·arangko on·china mol·molenba, ia a·ani pal uni nokdangna kamrangko on·skana ku·rachakaniko chu·sokatchipjaha ine Adokgre Reking-ni Chengsera R Marak minggipa me·chik saksa, Kharkutta-ni MLA Rupert Momin baksana MePDCL-ni official-rangko matnangataha aro ia a·arangko una on·pilchina gita dabiangaha.
Iani bidingo ia me·chikni, Williamnagar-o donggipa MePDCL-ni executive engineer-na badi ka·angani gitade, 2018 bilsini June aro July jani gisepo, Kharkutta-ni MLA Rupert Momin baksana MePDCL-ni official-rang uona re·angenba, corporation sub-station-ko rikna gita bigha gni a·ako on·china mol·moleaha aro ia a·ani pal uni nokdangni manderangna kamrangko on·skana ku·rachakahachim.
Ia me·chikni nokdango donggipa mande sakgnina Grade III gadangni kamko on·gen ine ku·rachakahani gimin uaba MePDCL baksa songgigrike an·tangni a·arangko on·ahachim.
Iani bidingo ua changni chang Kharkutta MLA-ko aro MePDCL-ni official-rangko grongeani ja·man, uko sal 89-na Casual Peon (Unskilled) dake kamo rakkiaha ine Power department-ni Deputy Secretary-oni seatgipa chittiko man·soaha.
Uni nokdangni manderangna kamrangko on·gen ine ku·rachakgipako chu·sokatchipjahani gimin ja·mano ua Kharkutta MLA-ko grongetaion, uko ua manengesa watataha aro MePDCL baksa songgrikanio pangchake ia a·ako GHADC-chi dingtangatahani gimin ua ia a·ako man·piljawaha inesa una MLA aganchakaniko on·ataha ine Chengsera Marak parakataha.
Uko MLA aro MePDCL-ni official-rang cha·bokaha ine matnangatengon, uni MePDCL baksa songgigrikani gita uni nokdangna kamrangko on·china ong·jaode a·ani damrangko on·skachina Marak dabiangaha.
Uni a·ao donggipa pang 200 bolsal aro gipin bolrangko den·ahani gimin tangka paisarangko gamchina gitaba ua dabiangaha.
