TURA: Re·baenggipa February-ni 27 tariko ong·atenggipa Meghalaya Legislative Assembly election-o a·dokni gitcham chief minister aro Trinamool Congress (TMC)-ni dilgipa Mukul Sangma-ni susaenggipa Songsak aro Tikrikilla constituency damgnikon ia chang National People’s Party (NPP) chegopgen ine Mongolbar salo, National People’s Party (NPP)-ni national president Conrad K Sangma parakataha.
Mongolbar salo ua, NPP-ni sakgipin dilgipa Thomas A Sangma baksa Songsak constituency-ni NPP candidate Nihim D Shira, Gambegre-ni NPP candidate Rakesh A Sangma aro Rongara-Siju constituency-ni NPP candidate Rakkam A Sangma-na campaign ka·angaha.
Songsak constituency-o NPP-ni national president, a·dokni gitcham chief minister aro TMC-ni candidate Mukul Sangma-ni kosako matnange aganangengon, bilsi bongana uni Songsak MLA ong·anio Congress-oni TMC-ona katanichi kamtangon jakchakgija ong·ahani a·sel Songsak-ni manderangnade maming kamrangkon chu·sokate on·na man·jaha ine parakataha.
Songsak-o seokako man·ani ja·manoba ia election-o Tikrikilla constituency-oba susakuengani gimin Songsak-ni manderangna mittelpilani grigipa ineba ua Mukul-ko matnangataha.
Manderang TMC-ko ra·chakna man·tokkujaenga aro Mukul seat damgnion amako man·na sienga ine janapatengon, “Songsak-ni manderang Mukul-ko sing·e ra·na nangchongmota, ua seat damgnikon chegenchimode badiako ua watna miksongenga,” ine Conrad aganaha.
NPP-ni candidate Nihim Shira, Songsak-ni manderangna dangdike on·na gita an·tangko on·kanggimin ong·ani gimin Songsak-ni manderang Nihim gita dakgipa dilgipako man·na namen rasong gnangbea ine janapatengon, “Batanggimin bilsi bongani gisepo Mukul Sangma, changsaba re·bae Songsak-o nangenggipa kamrangni gimin angming agangrikejaha maina ua an·tangni kamon jakchakgija ong·aiaha. Ua constituency-tangni manderangkon gualchipaha aro da·o ua Songsak baksana Tikrikilla-oba susae chena ka·dongenga. Manderang uni tol·e ku·rachakanirangko bebera·na nangja,” ine NPP-ni national president parakataha.
Meghalaya a·dok gimikon manderang, NPP-na chakpaaniko on·na gita ku·cholsan ong·tokaha ineba ua parakataha.
“Chinga bang·bata seat-rangkon chena ka·dongenga aro ia chango chinga Songsak aro Tikrikilla seat damgnikon chena ka·dongenga. Mukul-ni salrang bang·jaha maina manderang, an·tangtangna simsakgipa dolnasa pu·ontokna siengaha,” ine Conrad aganaha.