SHILLONG: Re·baenggipa February 27 tariko ong·atenggipa Meghalaya Legislative Assembly election-o chee sorkariko rikna man·genchimode, election manifesto-o a·dokni manderangna ku·mikchetanirangko sal 100-ni gisepon chu·sokatna a·bachenggen ine Mongolbar salo, Meghalaya a·dokni Trinamool Congress (TMC) parakataha.
Mongolbar salo, Jowai-o TMC-ni candidate Andrew Shullai-na campaign ka·angani somoio iako TMC-ni MP aro AITC Parliamentary Party-ni dilgipa Derek O’Brien parakataha.
“Jowai-ni TMC candidate Andrew Shullai, MLA ong·ani ja·man Meghalaya a·doko TMC sorkariko rikahaon chinga sal 100-ni gisepon chingni ku·mikchetanirangko chu·sokatna a·bachenggnok,” ine Jowai-o TMC-ni MP Derek O’Brien, kobor ra·timgiparangna aganaha.
TMC-ni WE Card aro MYE Card scheme-ko dingtang dingtang dolrangni matnangengani gimin jegalatengon, mitam manderangde MLA-na seokako man·ahaon badinggiparangsa ong·na a·bachenga indiba TMC-de ia scheme-rangchi manderangna uamangni man·gnirangkosa on·pilenga ine Derek parakataha.
A·dokni manderangna namgipa lekka pora, an·seng baljokani, kam ka·e cha·ani cholrang aro rama jal·langrangko nangbatenga ine janapatengon, “Gam-jinchide manderangni gisik ka·tongko salna man·jawa. Jowai-ni manderangna chingo nambatgipa candidate donga ine chinga bebera·a aro Jowai-ni manderangsan ong·aija indiba Meghalaya a·dok gimikon dingtanganiko nikna ka·oksitokenga,” ine TMC-ni MP parakataha.
Sorkariko rikaoni sal 100-ni gisepon ku·mikchetatangko chu·sokatgen: TMC
Date:
Share post:
