TURA: Meghalaya Legislative Assembly election-na Bharatiya Janata Party (BJP)-ni candidate-rangna campaign-ko ka·angna gita Union Home Minister Amit Shah, da·al Bristibar attamchibara Garo Hills-ona sokbaenga ine Budbar salo, BJP-ni state vice president aro South Tura-ni BJP candidate Bernard N Marak, kobor ra·timgiparangna parakataha.
Marak-ni parakatani gitade, Tura-ona sokbaani ja·man joljol Union Home Minister, Tura-ni Don Bosco School kal·chakramo ong·atenggipa BJP-ni tom·bimonganio bakko ra·e jinmana aganprakanggen.
Iani ja·mano ua Garo Hills-o donggipa BJP-ni dingtang dingtang district president-rang, mandal president-rang, election-o susaenggipa candidate-rang, election agent-rang aro BJP-na kam ka·enggipa manderangkoba gronge agangrikanggen ine Marak u·iataha.
Sukrobar saloba Amit Shah, skanggipa pringni bako dingtang dingtang Kristian mondolini dilgiparangko gronge agangrikanggen aro uni ja·man ua Tikrikilla, Raksamgre, Rangsakona, Ampati, Mahendraganj, Salmanpara, Dalu, Baghmara, Resubelpara aro Mendipathar constituency-rangonaba re·ange manderangna aganprakangnaba gnang ine u·iataha.
