SHILLONG: Re·baenggipa February-ni 27 tariko ong·atenggipa Meghalaya Legislative Assembly election-na skang Trinamool Congress (TMC) dal·a dal·a kattarangko aganengani gimin, March-ni 2 tariko election-ni result-ko parakatahaode TMC-ni dilgiparang kratcha·na nangtokgnok ine Bristibar salo National People’s Party (NPP) matnangataha.
TMC dolara, Meghalaya a·dokni ong·ja aro West Bengal a·doknisa ong·a ineba NPP matnangattaiaha.
A·dokni chief minister aro NPP-ni national president Conrad K Sangma, South Tura constituency-o amako man·gen ine TMC-ni national general secretary Abhishek Banerjee-ni ku·watsogipana aganchakaniko on·angengon, “March-ni 2 tarikna senge niaibo mai ong·a,” ine NPP-ni ku·wattimgipa aro Williamnagar-ni NPP MLA Marcuise N Marak parakataha.
Garo Hills-ni gimik dam 24 Assembly seat-rangoniko NPP ge·sakoba chena man·jawa ineba Banerjee aganahachim ine nikna man·a.
Banerjee-ni iandake agangipa kattarangna aganchakaniko on·angskaengon, “Ian mamingchiba ong·jae gisik suk ong·gijagipa mandeni agananisan ong·aia aro ian ultasa ong·na sienga. NPP bang·a seat-rangkon chena sienga aro uamangsa amchepako man·na sienga,” ine Marak aganaha.
Ramarango manderang baksa agangrike nigenchimode Banerjee-ni agangipa kattarangara ong·ja ine ma·sina man·aigen ineba NPP-ni dilgipa parakataha.
“Conrad Sangma-de chegipa ong·telgen aro iano maming jajaanian dongja. Garo Hills-ni manderang maiko chanchienga uko ma·sichenggijasa Abhishek Banerjee-de aganenga,” ine Marak aganaha.
Williamnagar-o TMC-ni tom·aniko ong·atgipani bidingo janapatengon, ia tom·anio Williamnagar-manchaoniko bang·gija manderangsan bak ra·aiaha aro uamang gipin a·jarangoniko aro Assam-onikosa ia tom·aniona rimbaaha ine Williamnagar MLA parakataha.
“TMC-ni tom·anio chinga a·paloni manderangkosa bang·e nikaha. Uamang Assam-oniba ia tom·aniona rimbaaha. Ia tom·anio Williamnagar manchaonide dongan dongja,” ine Marak aganaha.
West Bengal-ni political dolo napgipa a·dokni dilgiparang aro gipin manderang bakan doloni ong·katpilaigen ine NPP-ni sakgipin ku·wattimgipa Bajop Pyngrope-ba TMC-ko matnangataha.
