Batanggimin bilsi 5-oni NPP, UDP a·dokko togiaha: Abhishek Banerjee  

Shillong: Batanggimin bilsi 5-o National People’s Party aro uamang baksa bakrimgipa United Democratic Party, a·dokni  manderangko togiaha ine TMC general secretary Abhishek Banerjee aganaha.
Banerjee, Shillong-oni chel·kalanggipa Mylliem-o poll rally-o bak ra·e aganprakmitingo BJP aro UDP-ko matnangaha. Indake February 27 tariko ong·nasienggipa Assembly election-o Trinamool Congress-na puonchina mol·molangaha.
“NPP aro UDP a·dokni manderangko togiaha. Uni gimin na·simangba February 27 tariko togiskabo.”
TMC, ia changni election-o mongsonggipa opposition ong·enga, Meghalaya-ni ge 60 seat-ni Assembly-o TMC, ge 58 seat-o susaenga.
“National Peoples’ Party-na on·gipa vote ge·antian BJP-nasa ong·gen. United Democratic Party (UDP)-na on·gipa vote-ba BJP-nasa ong·aigen, iako gisik ra·tokbo, ine Abhishek aganaha.
UDP-ara NPP-ni dilenggipa Meghalaya Democratic Alliance (MDA)-ni bak ong·a, jean BJP-ni dakchakanio salgro-salaram-o bilona sokbaha. Ia changde na·simang pilakan noktangtangoni ong·kate cha·bokgipa sorkariko bon·atna puontokbo. TMC-na vote-ko on·on na·a Meghalaya-ko chugipa gadangona ra·angna dakchakgipa ong·gen. Sakgipinni jakchi sason ka·gipa sorkariko bon·atna nangengjok. Chong·motgipa dilgiparangko seokbo.”
Indake Banerjee, a·doko re·anggipa bilsio Mukroh-o ong·gipa obostako janapate, Conrad Sangma-ni sorkari, duko ga·akgiparangna maming dakchakaniko on·ja ine aganaha.
“Assam Police, jemangan ia obostao dos donggiparang ong·a, uamangde jakgittel ong·e rorame dongenga. Meghalaya sorkari, uamangna notice-kon on·jaha. Iandakgipa obosta West Bengal-ni sima ario ong·genchimode Chief Minister Mamata Banerjee, dos dakgiparangko watjawachim.”
Re·anggipa bilsi November jani 22 tariko Mukroh-o guli goao sakbonga manderang siaha. Assam Chief Minister Himanta Biswa Sarma, Mukroh-o ong·a obostako warachake, ‘police dolrang an·tangtangko chelchakanio aro sorkarini gam-jinko chelchakna guli goaha’ ine aganaha.
TMC-ni a·gipi dilgipa February 16 tariko Tura-o rally ka·mitingoba, ‘Sangma, central agency-na kene duko ga·akgiparangna kakket bichal ka·e on·ja’ ine aganaha.
Indake CM Sangma-ko Khasi aro Garo ku·sikko Constitution-ni Eight Schedule-o napatna chu·sokjani giminba matnangaha.
Trinamool Congress, Meghalaya -o sorkari rikode, Khasi aro Garo ku·sikkko Eight Schedule-o napatna dakgrikgen ine Banerjee aganaha.