SHILLONG: Adita salrangna skang, West Garo Hills a·jani Phulbari constituency-o dolgni dinggrikaniko dakdilgipa manderangoni mongsonggipa mandeko police-rang rim·na man·aha ine kobor on·aha.
Koborko on·ani gitade, ia mandeko rim·ani ja·man, mikkangchi iandakgipa so·sojengjeng ong·atanirangko daktaina man·jana gita ia mandeko March 3 tarikona kingking police-rangni ning·o donataha.
Meghalaya Legislative Assembly election-ko re·baenggipa February 27 tariko ong·atna siengon, adita salrangna skang, Phulbari constituency ning·o TMC aro NPP dolrangni gisepo dinggrikani ong·katahachim.
West Garo Hills Police-rangni u·iatani gitade, ia a·selni bidingo da·o dipet gimik sak 47 manderangko rim·aha aro sak 142 manderangko 107 CrPC-ni ning·o kachari dingtangmancha champengatmanahachim.
