A·doko tom·tomani aro kim·kimgipa ong·aniko NPP sorkari ra·baaha ine Conrad a·kanga

TURA: Batanggimin bilsi bongana sorkariko chalaianio National People’s Party (NPP)-chi dilgipa a·dok sorkari, tom·tomani aro kim·kimgipa ong·aniko a·dokna ra·bana man·aha ine Mongolbar salo, NPP-ni national president aro a·dokni Chief Minister Conrad K Sangma, Rangsakona constituency-ni NPP candidate Subir Marak-na campaign ka·angengmiting somoio parakataha.
A·doko tom·tomani aro kim·kimgipa ong·aniko ia sorkari ra·bana man·aha ine janapatengon, ia election-oba NPP-ko seoke sorkari rikpiltaina chol on·genchimode namroro silroroani kamrangko ra·bana rakbate kamko ka·angkugen ine NPP-ni national president, ku·rachakaniko on·angaha.
“Meghalaya a·dokni manderang, NPP-o ka·dongchakaniko on·aha. Chingni party manderangna on·kange kam ka·gipa party ong·a ine manderang nikmanaha. Chingo Meghalaya a·dokna nambata salrangko niksamsoanirang dongkuenga aro Meghalaya a·doko bilakbatatna gita ku·cholsan ong·e kamko ka·anggen,” ine Sangma aganaha.
Da·o election-ni somoio dingtang dingtang biaprangoni re·bae campaign ka·enggipa dingtang dingtang dolni dal·dalgipa manderang, election-ni ja·manode gimatokgnok ineba Sangma aganaha.
“Da·alo dingtang dingtang dolni dilgiparang a·dokona re·bae an·tangtangni candidate-rangna campaign ka·enga aro uamang dal·dala kattarangko agane, manderangko salna jotton ka·enga. Uamang an·tangtangan Meghalaya a·dokni gimin name ma·sigijagiparangsa ong·a aro da·o election-na mangmangsa gipin dolrangni kosako matnanganirangko dakenga. Election-ni ja·manode uamang gimikan a·dokoni gimaangtokgnok indiba NPP-mangmangsan Meghalaya a·dokni manderang baksa ong·aignok,” ine Sangma aganaha.
Da·alo Meghalaya a·dokni manderangna baseani somoi ong·enga aro ian NPP-o an·tangtangni ka·donganiko mesokani somoi ong·enga ineba NPP-ni national president parakataha.
Ia tom·bimonganio NPP-ni candidate Subir Marak-ba jinmana aganprakengon, ia election-o uko seokgenchimode Rangsakona-o pilakni gitan namroro silroroaniko ra·bana ua an·tangko on·kange kam ka·gen ine ku·rachakaniko on·angaha.
Garobadha jolrango lekka poraniko namdapatna gita ia biapo sorkari college damsako kulina nangenga ineba ia tom·anio Marak, NPP-ni national president-na parakataha.
Ia election-o ua seokako man·genchimode, an·tangni MLA ong·e man·enggipa dormahako bi·sarangni lekka porana jakkalanggen ineba Marak ku·rachakaniko on·angaha.
Rangsakona constituency-o NPP-ni candidate Subir Marak, Trinamool Congress (TMC)-ni candidate aro gitcham minister Zenith M Sangma baksa susagrikengachim ine nikna man·a.