A·songko aro M’laya-ko BJP dolsa tangka jakkalsretdilgipa ine Rahul Gandhi matnanga

SHILLONG: Gautam Adani gita dake bading chiwale cha·giparangna manderangni namgnirangko pale cha·anichi a·songko aro Meghalaya a·dokkoba tangka jakkalsretdilaha ine Budbar salo, Congress dolni gitcham president Rahul Gandhi, ma·mongni BJP sorkariko matnangataha.
Bading chiwalgipa manderangni namgninasa kamrangko ka·enganichi aro ramram manderangna simsak nirokanirangko on·jaenganichi BJP sorkari, bilko jakkaltsretenga ineba Gandhi matnangataha.
Budbar salo, Congress dolni tom·bimonganiko Shillong songjinmao ong·atanio Congress dolni gitcham president, hajal kotok manderangna aganprakangengon, India a·songo aro gipin a·songrangoba Gautam Adani-ni bading chiwalaniko tang·doatna kamrangko dakchake on·enga indiba a·songo kangal cholgrirangkode nirok sandijaenga ine a·songni Prime Minister Narendra Modi-ko matnangataha.
“Prime Minister Modi, gipin a·songrangona re·anga changantian uni nambatsranggipa ripeng Gautam Adani-sa boksisrangko man·skaenga. Prime Minister, Bangladesh-ona re·angode business contract-rangko Adani man·enga. Modi, Australia re·angode Adani-sa boksis man·skaenga. Sri Lanka re·angoba ua boksisko man·enga,” ine Gandhi matnange aganangaha.
BJP-ko ua Tribal-rangni kosako aro Muslim-rangni kosako chakatgipa dol ineba matnangataha.
Meghalaya a·doko sorkariko rikna man·ahaon, Congress dolni ku·rachakgimin gita Meghalaya a·dokko ‘Five Star’ a·dok ong·atna gita ua rake kamko ka·gen ineba ia tom·anio Rahul Gandhi, ku·rachakaniko on·angaha.
“Chinga (Congress) jaantian randi me·chik sakprakna gong 3000 ka·e uamangni account-rango chipe on·na ku·rachakaha aro iako chinga randi me·chik sakantian namgipa cha·anirangko cha·na man·na gita dedrangna namgipa lekka porako on·na man·na gitasa ja·ku de·enga. A·doko nokdang ge·antioni lekka pora donggipa mande sakprakna kamrangko on·na gitaba chinga ku·rachakaha,” ine Meghalaya Assembly election-na Congress dolni manifesto-o parakgipani gimin Gandhi aganaha.
Meghalaya a·dokni nanganirangko Congress ma·sia ine janapatengon, seokako man·e sorkariko rikna man·ahaon ia kamrangko chu·sokate on·na kamrangko ka·gen ine Gandhi parakataha.
Trinamool Congress (TMC)-koba ua BJP-ni Team-B ine matnangataha.
“TMC-ara BJP-ni sriksrik chalaienggipa dol ong·ama? Goa-o TMC-ni napanganiara Congress-ni kosako chakatna aro vote-rangko priprae galna miksonganisa ong·ama? Meghalaya a·dokoba TMC apsankon miksongengama? Meghalaya a·dokni manderangkoba TMC cha·bokna miksongengama?” ine ia sing·anirangna aganchakaniko on·china Congress-ni gitcham president, TMC-o dabiangaha.