Neng·nikanirangko NPP, silchidarechi ong·ja indiba agangrikanichisa namatna jotton ka·a: Conrad

TURA: Trinamool Congress (TMC)-ni dilgipa Mukul Sangma-ni chief minister ong·miting somoio pangnan bilko jakkalesa a·dokko sason ka·na jotton ka·rongachim ine Bristibar salo, National People’s Party (NPP)-ni national president Conrad K Sangma matnangatenba, NPP-de manderangni neng·nikanirangko bil-jakchi ba silchidarerangchi ong·ja indiba manderang baksa agangrikanichisa pangnan namatna jotton ka·skaa ine parakataha.
Bristibar salo NPP-ni president, Dadenggre aro Williamnagar constituency-rango NPP-ni candidate-rangna campaign ka·angengmiting somoio ia kattarangko aganaha.
Manderangni neng·nikanirangko man·engmiting somoirango manderang baksa agangrike namatani pal pangnan bilko jakkalesa manderangko sason ka·na jotton ka·aha ine Mukul Sangma-ko matnangatengon, NPP-de maming saloba manderangni kosako re·gipa dol ong·ja indiba pangnan manderangni nangnikanirangko chu·sokate on·na jotton ka·gipa dolsa ong·a ine Conrad parakataha.
“Batanggimin bilsi bongana sorkariko chalaianio dingtang dingtang dolrangni sorkariko matnange chingni kosako jegalanirangko dakahaoba ia sorkari changsaba bilko jakkaljaha indiba pangnan agangrikanichisa neng·nikanirangko namatna jotton ka·aha,” ine ua aganaha.
Batanggimin bilsi bongana sorkariko chalaianio, COVID-19 sajinma aro uandakgipa dingtang dingtang neng·nikanirangko chagrongna nangahaoba NPP sorkari, manderangni nanganirangkon mikkango done namroro silroroaniko ra·bana rakbee kamko ka·aha ineba NPP-ni national president parakataha.
Ia changoba NPP-an sorkariko riktaina siengani gimin gipin dolrangna pu·onede maming namgni dongjawa ineba Conrad, ia tom·anirango agantaiaha.
Meghalaya a·dok gimikon NPP-ni balwa rakbee balenga ine janapatskaengon, dingtang dingtang political dolni membor-rangkoba NPP-ona re·bae apsan kamrangko ka·china gita NPP-ni national president didiataha.
Assembly election-na campaign ka·ani somoi, Sonibar attamon bon·engahani gimin NPP-ni national president Conrad Sangma, dingtang dingtang biaprangona wenroroe campaign ka·aniko bilakbatatachim aro ua an·tangni South Tura constituency-oba attam aro walni somoirango campaign-ko ka·skaengachim.