SHILLONG: Meghalaya a·doko Bharatiya Janata Party (BJP), sorkariko rikna bilakbee kamko ka·engon, ian a·doko songdongenggipa Kristianrangna aro Scheduled Tribe (ST)-rangna kenchakna nangani ong·enga ine Congress matnangatskaaha.
NPP-chi dilgipa MDA sorkario BJP-ba MLA sakgnimangmang donge bak ong·paenga indiba Meghalaya a·dokara uamangni gitasa mesokna jotton ka·skaenga ineba Congress matnangataha.
“Ramarango an·ching MDA-o bakrimgipa gipin dolrangna bate BJP-ni poster aro banner kadeanirangkosa nikbatenga. Uamang jechiba re·angbo, Assam aro Arunachal Pradesh a·dokrango gitan BJP, joltangni party-rangkode minokna jotton ka·aia. Jolo songdongenggipa manderangnade uamang simsakja indiba pilakkon mingsan ku·sik, mingsan bebera·ani, cha·ani ringani, ganding chinding aro rongrangoba mingsano ong·atna jotton ka·skaa,” ine Congress dolni ku·wattimgipa Shama Mohamed parakataha.
Adita salrangna skangsan RSS dolni dakchakaniko man·enggipa Assam-ni Janajati Dharma Sanskriti Suraksha Manch (JDSSM), Kristian torom ra·gipa manderangni Scheduled Tribe (ST) status-ko ra·galchina dabiahachim ine janapatengon, “Ian salgro salaram a·dokrango Scheduled Tribe-rangni ong·baaniko aro mongsongbate Meghalaya aro Nagaland a·dokni Kristianrangko mande ra·gijaniko mesokani ong·a,” ine Shama parakataha.
“Meghalaya a·doko sorkariko rikna man·bebegenode ia niamrangko BJP ra·gatgenma?” ineba ua sing·doangaha.
Kristianrangni gilja nokrangko chadrapanirang batroroengani gimin janapatengon, iani bidingo BJP, Meghalaya aro salgro salaramni gipin a·dokrangna maidakgipa ku·rachakaniko aro chel·chakanirangko on·na man·gen ine Congress dolni dilgipa sing·doataha.
