TURA: Re·anggipa Sonibar walo, election-na campaign ka·ani somoi matchotani ja·mano, songni manderangna tangka sualna jotton ka·enga ine matnangenba, Association for Democracy & Empowerment (ADE)-ni president baksana adita sak manderangko, Dalu constituency-ni ning·o donggipa song damsani manderang rim·aha.
Koborko on·ani gitade, ia manderangoniko songni manderang, gong 1,74,360 tangkarangkoba man·aha aro ja·mano ia manderang baksana uamangoniko man·gipa tangkarangkoba police aro election official-rangna pakwate on·ataha.
Police-rangni u·iatani gitade, Sonibar walo ia songni manderang, dolgni manderangko rim·na man·aha aro ia dolgnioni dolsaonikode songni manderang gong 1,74,360 tangkarangko man·aha indiba ADE-ni president-onikode gong 32,000 tangkarangkosan man·aiahachim.
Rim·ako man·gipa dolsani manderangara, Tura KA Road gittimni Dikan Marak, Dalu police station-ni ning·o donggipa Kujikura songni Jepan Marak aro Dalu police station-ni ning·o donggipa Mangkenggre songni Kambe M Marak ong·achim aro uamangoniko songni manderang gong 1,74,360 tangkarangko man·ahachim.
Indake ong·engon, an·tangni kosako matnanganirangko ADE-ni president Dalseng Bira Ch Momin jegalatskaaha aro ua somoio ua nogipa nanggipani biaona re·ange re·bapilengmitingkosa songni manderang skatang potchipe rim·aha ine parakataha.
“Sukrobar salo angni nogipa nanggipani bia Joshipara songo dongani gimin anga biaona re·ange, Sonibar attamchibara nokona re·bapilengmiting somoio Doriapara songoni angni jonggipa nanggipa angbaksa songona re·bapana am·ahani giminsa anga an·tangni jonggipa nanggipako Doriapara songona salangjolengachim. Songona re·angengmiting somoio chinga su·buna skani giminsa song sambao donggipa ramao neng·takon, songni manderang chingko banoni re·bagipa manderang ine rikbae, chingko election-na wengiparang ine potchipenba attamni 6:30 bajimango rim·aha,” ine Momin parakataha.
Uamangko rim·ani ja·man, walni 9:00 bajimango songni manderang dolsa manderangko rim·taiaha aro uamangkoba apsan dolonin ine potchipenba kragija dake doka sata dakan baksana kragija kattarangchi aganaha ine Momin parakataha.
“Chingko iandake rim·e bichal ka·engmiting somoiosa election observer-rang ua biapona sokbae, chingko police thana-ona rimangaha aro thana-ona rimange bichal ka·aha indiba angnikode songni manderang an·tangtangan gong 32,000-kosan man·aiaha ine aganatahani gimin ja·mano angko police-rang aro election official-rang watpilataiaha,” ine ADE-ni president parakataha.
Uko skatang rim·e kragija dake dokgipa manderangara NPP-ni manderangsa ong·achim ineba Momin parakataha.