SHILLONG: Meghalaya Legislative Assembly-na da·al Sombar salni bako election-ko ong·atengon, Sohiong constituency-na agrede a·dok gimikni dam 59 constituency-rangon, a·dokni manderang an·tangtangni dilgiparangko ia salo pu·onne seoktokengaha.
Re·anggipa February-ni 20 tariko, a·dokni gitcham home minister aro United Democratic Party (UDP)-ni candidate HDR Lyngdoh, tanggitik ka·tong saaniko man·e siangahani gimin Sohiong constituency-ode MLA election-ko dingtang salona ra·doatskaahachim aro uandaken ia constituency-ode gipin constituency-rang baksa apsan election-ko ong·atjahachim.
Ia chang Meghalaya Assembly election-o dingtang dingtang dolrangoni aro Independent candidate-rang gimik sak 369 candidate-rang susaenga aro ia sak 369 candidate-rangko a·dok gimikni sak 21,75,236 electoral roll-rango biming segatgipa manderang seokengachim.
Sak 369 candidate-rangoni sak 36-de me·chik candidate-rang aro sak 44-de Independent candidate-rang ong·enga.
Ia bilsini Assembly election-o national political party ine mingako man·gipa BJP, Congress, National People’s Party (NPP) aro Trinamool Congress (TMC)-ko man·chape gimik dol 13 political party-rang susaskaenga.
Ia Assembly election-o susaenggipa sak 369 candidate-rangoni sak 60-de BJP-oni, sak 60-de Indian National Congress (INC)-oni, sak 57-de NPP-oni, sak 56-de TMC-oni, sak 46-de UDP-oni, sak 11-de HSPDP-oni, sak 9-de PDF-oni, sak 2-de GNC-oni, sak 3-de JD(U)-oni, sak 2-de RPI-oni, sak 6-de RPI (Athawale)-oni, sak 18-de VVP-oni aro sak 44-de Independent candidate-rang ong·enga.
Ia lak 21-na batgipa voter-rangoni lak 10.99-de me·chikrang aro lak 10.68-de me·asarang ong·a aro ia chango skanggipa changna dilgipako seokenggipa manderangba sak 81,000-mangni gita donga.
Meghalaya a·dok gimiko donggipa dam 60 constituency-rangoni dam 36-de Khasi-Jaintia Hills jolrango aro dam 24-de Garo Hills jolo ong·enga aro a·dok gimiko dam 3,419 polling station-rang dongskaa.
Pu·onaniko da·al pring 7:00 bajioni a·bachengate 4:00 bajio matchotatgen aro pu·onanirangko re·baenggipa March-ni 2 tariko chanskae, apsan salon result-rangko parakatgen.
