SHILLONG: Dingtang dingtang News Channel-rangni ‘Exit Polls’-ko dakanio National People’s Party (NPP)-ko bang·bate seat chegen ine mesoksoengon, manderangni ka·dongsoengana baten seat-rangko chenaba gnang ine NPP-ni national president Conrad K Sangma parakatskaaha.
Bang·bata News Channel-rangni Exit Polls-ko dakanion NPP-ko komibeoba dam 17-oni dam 26 seat-rangkode chenaba gnang ine mesoksoanirangko nikna man·ahachim.
Indake ong·engon, manderangni ka·dongsoengana baten NPP seat-rangko chenaba gnang ine Conrad parakatskaaha.
Sorkariko rikna gita komibeoba sak 31 MLA-rangko nangskaengon, da·o dipet NPP, badia dolrang baksa bakrime sorkariko rikna miksongengachim, iani giminde ua mamingkoba parakskajaha.
“Chingni MLA-rang name chanchichengesa ja·kurangko de·gen,” ine NPP-ni national president parakataha.
“Sorkariko rikanio manderangni namgnini gimin chanchiesa ja·kuko de·na nanga ine chinga pangnan aganronga aro kim·kim ong·nagipa sorkariko rikna gitasa chinga ja·kurangko de·gen,” ine Sangma aganaha.
Exit polls-o NPP-kon bang·bate chegen ine mesoksoahani gimin ua an·tangni kusi ong·aniko parakatengon, manderangni ka·dongsoengana baten seat-rangko chenaba gnang ine Sangma parakataha.
“Exit polls-kode pangnan election-na salbonga saldok skangsa dakrongachim. Batanggimin salbri salbongani gisepo chinga chingni re·mikkanganiko nikna man·aha. Exit polls-o mesoksoana baten chinga seat-rangko ka·dongsoengachim. Exit polls-ode an·ching name ka·dongna man·ja aro result-ni ja·mansa chinga ja·ku de·gnikode aganna man·gen,” ineba ua aganaha.
Indake ong·engon, ia election-o NPP, dam 25 seat-rangko chena nisanko donahachim indiba iana baten seat-rangko chenaba gnang ine NPP-ni state president WR Kharlukhi-ba parakataha.
Apsan daken, NPP-ni national vice president aro a·dokni Deputy Chief Minister Prestone Tynsong-ba manderang NPP-nan pu·ontokaha ine an·tangni ka·dongchakenganiko parakataha.
“Ia election-o anga bang·en songreaha aro constituency ge·antionan re·angaha. Pilak biaprangon anga manderangni bakrimaniko nikna man·aha,” ine Tynsong aganaha.
Ia election-o NPP, dam 32-33 seat-rangkode chetelgen ineba ua an·tangni ka·dongchakenganiko parakataha.
Chief minister-ko seokani bidingo janapatskaengon, seokako man·gipa gital MLA-rang apsan asonge chanchirimgen aro MLA-rangni nangnikani gitasa ong·gen ine NPP-ni national vice president parakataha.
