SHILLONG: Meghalaya Assembly election-ni result-rangko da·al Bristibar salni bako parakatna siengahaon, re·anggipa Mongolbar salo, National People’s Party (NPP)-ni national president Conrad K Sangma aro BJP-ni dilgipa Himanta Biswa Sarma, Guwahati songjinmao gronggrike adita somoirangna agangrikangaha ine kobor on·aha.
Kobor on·timgiparangni u·iatani gitade, NPP-ni national president aro Assam a·dokni Chief Minister, Mongolbar attamni 9:00 bajimango Guwahati songjinmani Radisson Blue Hotel-o grongaha aro uamang minute 30-mangna golpogrikaha.
Dingtang dingtang News channel-rangni Exit Polls-o NPP-ko komibeoba dam 17-oni dam 26 seat-rangkode chenaba gnang ine mesoksoanirangko nikna man·ahani gimin NPP aro BJP dilgiparangni agangrikanio sorkariko rikani bidingo agangrikahakon ine chanchichiptokengachim.
Assam a·dokni Chief Minister aro North East Democratic Alliance (NEDA)-ni convenor Himanta Biswa Sarma-ba adita salrangna skangsan, Meghalaya a·doko NDA-an bang·bate seat-rangko cheenba sorkariko rikgen ine a·kangatahachim.
Meghalaya a·dokni MDA-o aro ma·mongni NDA-oba BJP aro NPP dolrang apsan bak ong·ahani gimin Meghalaya a·doko NPP-ni dilanichi sorkariko riktaina nanggenchimoba BJP-de bak ong·telgen ine niksamsona man·enga.
2018 bilsini Meghalaya Assembly election-o BJP, seat damgnikosa cherikna man·aiahaoba ia changode bang·bate seat-rangko chena ka·dongengani gimin a·dokni dam 60 constituency-rangon susaangahachim ine nikna man·a.
