SHILLONG: National People’s Party (NPP) parliamentary party-ni dilgipa Conrad K Sangma, re·baenggipa March-ni 7 tariko, gnigipa changna a·dokni chief minister ong·e ku·mikchetanggen.
Kobor on·timgiparangni u·iatani gitade, gital sorkariko rikanio NPP-ni sak 26 MLA-rang baksana Bharatiya Janata Party (BJP)-ni MLA sakgni, Hill State People’s Democratic Party (HSPDP)-ni MLA sakgni aro Independent MLA sakgniba bakrimna kusi ong·aniko paraktokaha.
Meghalaya a·dokni dam 60 seat-rang donggipa Assembly-o sorkariko rikna gita komibeoba dam 31 seat-rangko nanga aro ia election-o NPP, dam 26 seat-rangko chee, dolsanchisa sorkariko rikna man·jaengachim. Indake ong·genchimoba da·o BJP-ni MLA sak 2, HSPDP-ni sak 2 aro Independent MLA sakgnian NPP baksa bakrimahani gimin MLA-rang sak 32 ong·e sorkariko rikna gita altuen man·engahachim.
Koborko on·ani gitade, ia sak 32 MLA-rangni bimingko Sukrobar attamo NPP-ni dilgipa Conrad Sangma, a·dokni Governor Phagu Chauhan-na on·eaha.
Batanggimin bilsi bongana NPP-ni dilanichi MDA sorkariko chalaianio United Democratic Party (UDP)-ba bak ong·ahachim indiba ia changode NPP-chi dilenggipa sorkario bak ong·skajaenga ine kobor on·timgiparang parakataha.
A·dokni gitcham chief minister aro Meghalaya Trinamool Congress (TMC)-ni dilgipa Mukul Sangma-ba dingtang dingtang dolrang baksa bakrime sorkariko rikskana jotton ka·engachim ine nikna man·a.
Ia election-o TMC aro Congress dolgnian seat dambonga ka·e cheahachim aro UDP dam 11-ko cheskaahachim. Unbaksana Voice of the People’s Party (VPP)-ba seat dam 4-ko cheahachim. Ia dolbrini seat-rangko chandimgenchimoba dam 25 seat-rangsan ong·engani gimin sorkariko rikna nangenggipa dam 31-na chu·ongkujaengachim.
Indake ong·genchimoba, NPP aro BJP-ko gale, TMC, UDP, VPP, HSPDP, PDF aro Independent MLA-rang bakrimskagenchimode dam 31 seat-rang ong·engani gimin sorkariko rikskana man·genchim.