SHILLONG: National People’s Party (NPP)-ni national president aro parliamentary party-ni dilgipa Conrad K Sangma baksana Meghalaya Legislative Assembly-ni gital seokako man·gipa gipin MLA-rang, Sombar salo ku·mikchetaniko dakangtokaha.
Gital MLA-rangni ku·mikchetaniko Pro-tem Speaker Timothy D Shira dilangaha.
NPP baksa bakrimgipa MLA-rang da·o gimik sak 45 ong·ahani gimin Meghalaya a·doko gital sorkariko rikna altuaen man·engaha aro ia sorkariko NPP-ni dilgipa Conrad K Sangma, chief minister ong·e dilangna siengahachim.
Chief Minister Conrad K Sangma aro uni gital minister-rang, Mongolbar salo, Shillong songjinmani Raj Bhawan-o ku·mikchetangskagen aro ia gital minister-rangni ku·mikchetanio a·songni Prime Minister Narendra Modu aro gipin dilgiparangba dongpae bakko ra·anggen.
Conrad Sangma-ni dilanichi gital rikenggipa sorkario, NPP-ni sak 26 MLA-rang baksana UDP-ni sak 11, BJP-ni sak 2, PDF-ni sak 2, HSPDP-ni sak 2 aro Independent MLA sakgniba bakrimaniko on·aha.
