SHILLONG: Ia chang, National People’s Party (NPP)-chi dilenggipa Meghalaya Democratic Alliance (MDA 2.0) cabinet-o Bharatiya Janata Party (BJP)-na biap damsakosan tikataiahani gimin BJP-ni MLA sakgni, chong·motan Alexander Laloo Hek aro Sanbor Shullai, ia biap damsako sualgrike ka·na tik ka·angskaaha.
Mongolbar salo, Chief Minister Conrad K Sangma-chi dilenggipa MDA 2.0 sorkarini cabinet-o AL Hek-ba minister ong·e ku·mikchetna skang, iako BJP-ni dilgiparang tik ka·angaha.
Iani bidingo NPP-ni national president Conrad K Sangma-na seachi u·iatengon, BJP-na tikatgimin Cabinet-ni seat damsako bilsigni atana AL Hek jako ra·angani ja·man 2025 bilsini August 7 tarik dipet bilsigni atana sakgipin MLA Sanbor Shullai-na on·skana gita BJP-ni dilgiparang aro MLA sakgnini gisepo tik ka·aha ine BJP-ni state president Ernest Mawrie parakataha.
Iani bidingo MLA sakgnikoba mande ra·grikchina aro namgipa sorkariko rikna man·na gita sakgnini gisepo ma·sichakgrikani dongchina gita aganmanaha ineba Mawrie parakataha.
“Uni gimin BJP-ni tik ka·giminko mande ra·china aro MLA sakgninan apsan cholko on·china chinga nang·ko mol·molenga,” ine BJP-ni state president, NPP-ni national president-na seatgipa chittio janapataha.
