SHILLONG: Ia bilsini Meghalaya Assembly election-oba Kristianrangko salna man·jae chu·sokgipa ong·taijahani gimin aro election-na campaign ka·ani somoirango a·dokni BJP dilgiparangko nichanggaltokahani gimin a·dokni bang·bata BJP dilgiparangan, BJP-ni national vice president aro Meghalaya a·dokni in-charge M Chuba Ao-ni kamo suk ong·gijaniko parakattokaha.
Meghalaya a·doko BJP-ko dilenggipa mitam manderangni parakatani gitade, bang·bata biaprangon BJP-ko Kristianrangni kosako chakatgipa dol ine matnangtokengani gimin Meghalaya a·dokoba iandake manderangni gisiko chanchianiko chel·atna man·gen inesa Chuba Ao-ko BJP-ni national vice president aro Meghalaya-ni in-charge dake songahachim indiba Meghalaya a·doko Kristianrangko ia election-oba salna man·taijahani gimin uni kamo ua chu·sokgipa ong·taijahachim.
Meghalaya a·doko ua jolni dilgiparang baksa kamrangko ka·ani pal Shillong aro Tura-ni gisepo helicopter-osa songree bang·bata somoirangkon bon·ataha ine matnangatengon, iani giminan da·o Chuba Ao-ko Meghalaya-ni in-charge ong·aoniko ra·galchina dabitokengaha ine mitam dilgiparang parakataha.
Ia chang Assembly election-ode BJP, batanggimin changrangona bate nambate dakgen ine ka·dongesa a·dokni dam 60 constituency-rangon candidate-rangko susaatahachim aro exit polls-oba BJP, komibeoba dam 6-oni dam 11 seat-rangkode chetelgen ine ka·dongsotokengachim.
Indake ong·genchimoba, ia changoba a·doko BJP, nambate dakna man·jae, 2018 bilsini Assembly election-o gitan seat damgnirangkosan chetaiahachim aro skango chegipa apsan MLA-rang, chong·motan AL He karo Sanbor Shullai sakgnisan ia changoba chegipa ong·taina man·aiahachim.
2014 bilsionin BJP, India a·song gimikon chu·sokgipa ong·na man·engahaoba Meghalaya a·dokode da·onan seat damgnina bate chena man·kujaengachim ine nikna man·a.