SHILLONG: Meghalaya a·doko National People’s Party (NPP)-ni dilanichi gital MDA 2.0 sorkariko rikahaon, NPP-ni dilanichi sorkario bak ong·na jechakgipa Voice of the People’s Party (VPP) da·o opposition-o asonge a·dokni namgnina kamko ka·angskagen ine parakataha.
“Chinga an·tangtangni mikkimko rakkina nangnikenga aro chinga opposition-o asonge a·dokni namgnina kamko ka·angskagen,” ine Budbar salo, VPP-ni president Ardent Miller Basaiawmoit parakataha.
Opposition-ko dilgipani kamni gimin sing·on, opposition dolni dilgipako seokanide Congress aro TMC-ni jakosa ong·aia ine Basaiawmoit parakataha.
Indake ong·engon, Assembly Speaker-ko seokani ja·man, Opposition-ni MLA-rang apsan tom·e chanchirimgen ine Congress Legislature Party (CLP)-ni dilgipa Ronnie V Lyngdoh parakatskaaha.
“Opposition MLA-rangni gisepo da·o dipet chinga bakrime dolko rikkujaengoba apsan melie ma·sichakgrikanide dongmanaha,” ine Lyngdoh aganaha.
Gital Speaker-ko seokmanahaon opposition MLA-rang uko gronge, opposition-ni dilgipako seokani bidingo agangrikgen ineba ua aganaha.
Opposition dolni dilgipako songna gita Congress, TMC aro VPP dolrang, bakrime Opposition dolko songchengna nangengachim.
Ia chang Assembly election-o Congress seat dam 5, TMC-ba dam 5 aro VPP seat dam 4-kosan cheaiahani gimin ia dolgittamonin Opposition dolko dilna gita a·kangna bil dongkujaengachim.
