TURA: Adita salrangna skang matchotanggipa Meghalaya Assembly election-o a·dokni bang·bata biaprangon Bharatiya Janata Party (BJP)-ni candidate-rang chu·sokgipa ong·jahani gimin BJP-na kam ka·enggipa manderang suk ong·gijaniko parakattokaha.
BJP-na kam ka·enggipa manderangni parakatani gitade, dingtang dingtang a·selrangchi ia election-o BJP chu·sokgipa ong·na man·jaha indiba mongsonggipa a·selde a·doko BJP-ko dilenggipa manderang, gisiko nange kamko ka·jahani gimin aro songadam nokadamrango maming simsak nirokanirang dongjahani a·selsa ong·aha.
“BJP-ni state president aro uni office-ko election-ni gimin maming ma·sigijagipa aro onbatgipa gadangni gimin ma·sigijagipa vice president saksa, treasurer, state secretary aro executive membor-sa chalaienga. Ia dilgiparangoni mitamde an·tangtangni constituency-rango gipin political dolrangnasa kamko ka·enga. Bilsi gittamna skang president office-o asongchengaonin, doltangko bilakatna maming kamrangko ka·a dongjaha,” ine BJP-na kam ka·enggipa manderang janapatenba, Tribal politics aro Kristianrangni gimin ma·sigijagipa dolsa manderangsa a·doko kamko ka·aha ine parakataha.
A·doko BJP-na kam ka·enggipa manderang bang·batahani gimin ma·mongo BJP-ni dilanichi sorkarini ra·gatenggipa kamrang aro dingtang dingtang scheme-rangni giminba manderangna agan-talate on·na nangachim indiba a·doko BJP-ko dilenggiparang iani bidingo maming ja·kurangko de·jahani a·selsa NPP, an·tangtang rasongko a·kangna man·skaaha ineba BJP-na kam ka·enggiparang parakataha.
Garo Hills-ode joltangni dilgiparang, rakbee kamrangko ka·soahani gimin election-ni result-rang adita namkalbataha ine janapatengon, songadam nokadamrangon BJP-ko bilakatna gita kamrangko rakbate ka·genchimode a·dok gimikon BJP namkale dakna man·genchim ine BJP-na kam ka·enggipa manderang parakataha.
“Ia election-ni ja·man, an·tangtangni kamko nipiltaie kamrangko namdapatna gita BJP kamko ka·na nanggnok,” ine BJP-na kam ka·enggipa manderang parakataha.