RESUBELPARA: Songsalni aro a·songni dal·roroanio me·chikrangni on·gilaniko gisik ra·na aro mande ra·pilskana gita Sukrobar salo, International Women’s Day-ko North Garo Hills a·jani Resubelpara-o maniangaha.
Ia program-ko ong·atanio North Garo Hills a·jani Assistant Deputy Commissioner Tadingchi N Sangma, mongsonggipa sokgipa ong·e jinmana aganprakangengon, me·chikrangara nokdangko simsak nirokgiparang, dedrangna didianiko aro a·gilsakni seng·aniko on·giparang ong·e me·chikrangni daitoara namen mittelpilaniko man·na kragiparang ong·a ine parakangaha.
Me·chikrang pilakkon a·gilsakni seng·aniko ra·e, an·tangtangni janggi tanganiko tang·doatchina aro songsalo namroro silroroanina on·gilchina gitaba ua didiangaha.
Self help group (SHG)-rangara a·songna man·dapaniko ra·bagiparang ong·a ine janapatengon, bang·bata SHG-rangon me·chikrangsa bak ra·giparang ong·e, an·tangtangni namgnina tangka paisarangko on·gile kamrangko ka·enga ine Sangma parakataha.
Ia tom·anio North Garo Hills a·jani DSWO Christina Marak-ba jinmana aganprakangengon, International Women’s Day-ko maniani bidingo agan-talate on·angenba, ian me·chikrangna on·gimin bil aro cholrangni gimin u·iataniko on·na miksonge manienggipa sal ong·a ine parakangaha.
Ia salko manianio North Garo Hills a·jani Ukil Betsy Momin-ba DLSA-ni ning·o me·chikrangna on·enggipa bil aro kamrangni gimin agan-talate on·angaha.
Ia program-ko ong·atanio One Stop Centre-o kam ka·enggipa manderang, dingtangmancha me·chikrangni kosako ong·gija dakgipa kamrangni bidingo dakmesokangskaaha.
