SHILLONG: Election-rang matchotangenba da·o gitalgipa MDA 2.0 Sorkariko rikchakatengon, a·dokni skotong Shillong songjinmao pangnajol namatna man·kugijagipa rama changket sikket dakaniko namatanina manderang ia gitalgipa sorkario ka·donge nichaksoenga.
Saksa niksenggipa lawyer aro Shillongo songdonggipa, P Yobin indake aganaha je, songjinmao rama changketaniko namatna ia gitalgipa sorkari bakan kam ka·na nanga, je neng·nikanikon Shillongo songdonggipa sakantian chagrongna gita nangenga.
Iana agreba, a·doko donggipa a·ningni gamrangko aro a·doko gipin man·gipa cholrangkoba scientific-ni bewalo jakkalna gita sorkari cholrangko dakna nanga ineba Yobin aganaha.
“An·ching badita somoiona Ma·mongo pangchake donggen. Salsaode an·chingba jakgitel ong·na nanggen, Meghalaya a·dok, a·ningni gamrango man·e dange cha·gipa ong·a indiba uarangko scientific bewalo maikae bikote jakkalgen uko an·ching ma·sija, an·ching uarangko scientic-ni gita bikotna changode, an·chingni nanganirangna an·ching Ma·mongo pangchakna nangjawachim,” ua agandapaha.
Saksa retired IAS officer aro saksa activist Toki Blah, a·dokni education system-ko chu·gimikkon nipilna nangenga ine agansakaaha.
Songadamrango primary education-ko chu·gimikkon simsakjaenga ine aganengon, songadamrango neng·e-dike primary school-rangsan dongaia, iani a·selba skul re·e tong·dipet dontonganiona sokenga, jedakgipa kaman jajrengna nangbeani ong·a, Blah aganaha.
