SHILLONG: Meghalaya a·doko niam gri anggal badinganiko champengatani ja·manoba dingtang dingtang biaprango niam gri anggal salruraanirangko nikna man·engkua ine Meghalaya Clean & Green Organisation (MCGO) parakatenba, iani bidingo sandirokatchina gita Khasi Hills Autonomous District Council (KHADC)-ko didiataha.
Iani bidingo KHADC-ni chief forest officer (CFO)-ba badi ka·e sedoatengon, Mawmaram Nongthliew-oni Mawlyndep-ona, Umbir-oni Lad Umsaw-ona, Dongki Ingding, Umpdem, Sohjarang, Zero point-oni Umsning-ona aro Umrit-oni Umling-ona niam gri anggal salruraanirangko nikna man·rongenga ine MCGO-ni dilgiparang parakataha.
MCGO-ni parakatani gitade, anggalrangko salruraenggipa truck garini driver-rang, district council-ni dingtang dingtang check gate-rango, gong 500, gong 1000 aro gong 1500 ka·e gamrongenga ine an·tangtangan ku·rachakahachim.
Iani bidingo ta·raken inquiry-ko dakatenba, buring bolgrimrangni nosto ong·roroangenganiko champengna gita niam gri anggal badinganiko dontongna ge·etaniko on·china MCGO, KHADC-ko didiataha.
Meghalaya a·doko niam gri anggal badinganiko champengna gita a·dok sorkari, Meghalaya Charcoal (Control of Production, Storage, Trade and Transit) Rules, 2008-ko u·iatmanahachim ine nikna man·a.
Ia niam gitade, anggal bikotgipa aro chimonggiparang, DFO (Territorial)-ni office-o biming segatna gita nangachim. Anggal tarianiara ia niamrangko pe·ani gita ong·enga aro niam gri bol den·aniko champengna gita Supreme Court-ni dongimin niamba dongani gimin Supreme Court-ni niamko pe·ani gitaba ong·engachim.
