RESUBELPARA: Bijolini rel gariko watna gita Dudhnoi-oni Mendipathar railway station-ona bijoli line-ko sringani kamrang da·o matchotahani gimin Mendipathar railway station-oniba da·ode manderang bijolini rel garirango re·e ta·rakbate sokna man·gnok.
Mendipathar railway station-ko 2014 bilsio a·songni Prime Minister a·bachengate on·angani ja·man da·ona kingkingan Meghalaya a·dok gimiko ia damsamangmang railway station-san dongkuengachim aro ia railway station-ko a·bachengata intalan, Garo Hills-ni manderang aro mongsongbate Mendipathar jolrango donggipa manderang, dingtang dingtang kamrangna aro mongsongbate Guwahati songjinmarangona re·ange, an·tangtangni game ge·e man·gipa bosturangko pale sim·e cha·naba chol ong·engahachim.
Indake ong·engon, da·o Mendipathar railway station-o electric traction-ko a·bachengatahaode, Mendipathar-oniba bijolini rel garirangko watgnok aro unode manderang ta·rakbate an·tangtangni kamrangona sokna man·gnok.
Northeast Frontier Railway (NFR) official-rangni u·iatani gitade, ia apsan rama gitan manderangko salgipa aro bostu salgipa rel garirangba ta·rakbate re·gnok aro manderang ta·rakbate biaptangtangona sokna man·gnok.
Gipin a·dokrangoniko ra·baenggipa parcel aro gipin bosturangkoba ia bijolini rel garirango ra·bae Meghalaya a·dokona naljokbate aro ta·rakbate sokbana man·gnok ineba NFR official-rang parakataha.
