BYRNIHAT: Guwahati-Shillong ramajolo donggipa Jirang constituency-ni NPP-ni dilgiparang mijalo Byrnihat Conservation Training Institute-ni Auditorium Hall-o programme mingsako ong·atmitingo constituency-ni gnigipa changna chebataigipa MLA Sosthenes Sohtun-ko mande ra·aniko dakaha.
Mande ra·aniko dakgipa programme-o MDC Victor Rani aro NPP Jirang Block-ni General Secretary Balawan Syiemiong-ma·angko man·chape pilak party-ni dilgiparang aro party-na kam ka·giparang dongpaaha.
Jinma tom·ao aganao ru·utgija salo matchotanggipa dal·gipa election-o neng·tak-neng·rak gri raken kam ka·gipa party-ni dilgiparangko aro kam ka·giparangko Sosothenes Sohtun mittelaha aro da·o ong·enggipa MLA-ko aro party-ko election-na uni warachake susarimgiparangchi bang·a matnanganirangko man·genchimoba uko cheatna nangchongmota ine kam ka·aha, ua agandapaha.
Gnigipa changna uamangni MLA ong·na manderang uko seoktaiaha, da·ode batanggimin bilsi bongako tosusae constituency-ko gimikni gitan namroro-silroroaniko ra·bana re·baenga bilsi bongao nambate kam ka·achi constituency-ni manderangko mande ra·skana uni dakgni kam ong·a, ua agandapaha.
