SHILLONG: National People’s Party (NPP)-ni dilgipa aro Resubelpara-ni MLA Timothy D Shira-ko Sombar salo, gnigipa changna Meghalaya Legislative Assembly-ni Deputy Speaker-na seokangtaiaha.
Opposition dolrang, chong·motan Congress, All India Trinamool Congress (AITC) aro Voice of the People’s Party (VPP) dolrangoni darangba Deputy Speaker-ni kamna susagiparang dongjahani gimin Shira-ko maming jegalani grian Deputy Speaker-na seokangtaiaha.
Batanggimin chang Assembly-oba ua deputy speaker ong·e kamko ka·ahachim.
Deputy speaker-ni kamna election-ko ong·atanio nomination paper kingsakosan on·aiahani gimin Timothy D Shira-ko Assembly-ni deputy speaker songaha ine Assembly-ni Speaker Thomas A Sangma parakataha.
Deputy Speaker-ni kamna seokani ja·man Shira-ko a·dokni Chief Minister Conrad K Sangma aro gitcham Opposition dolni dilgipa Dr Mukul Sangma, uni chokkiona dilangaha.
Uamang sakgnian ja·mano Deputy Speaker-na mande ra·pilskae mittelpilani kattarangkoba aganangaha.
