SHILLONG: Mongolbar salo, Opposition Voice of the People’s Party (VPP)-ni MLA Ardent Miller Basaiawmoit, so·sojengjeng ong·enggipa Assam aro Meghalaya a·dokni simarango songdongenggipa manderangna naljokaniko on·ani bidingo a·dok sorkariko sing·doangaha.
Assembly Budget Session-ni question hour-o a·dok sorkariko sing·doangengon, Meghalaya a·dokni name mesokengani a·selan Assam sorkari, Mukroh songkoba a·kangengaha aro uandaken ia jolrango songdongenggipa manderang salantian kenchipchipe janggi tangna nangtokenga ine Basaiawmoit parakataha.
VPP MLA-ni sing·anirangna aganchakaniko on·angskaengon, a·dok damgnini sima jolrango so·sojengjeng ong·enggipa bangki damdok biaprangkoba namatna gita a·dok sorkari kamko ka·anggen ine a·dokni Chief Minister Conrad K Sangma, ku·rachakaniko on·angaha.
Meghalaya a·dokni sima jolrango songdongenggipa manderangna naljokaniko on·na gita a·dok sorkari, gital police station aro police outpost-rangko kulidape on·aha ineba Chief Minister parakataha.
Chief Minister-ni parakatani gitade, Assam aro Meghalaya a·dokni simarango dongsoenggipa police station aro outpost-rang baksana a·dok sorkari, gital police station aro police outpost-rangko kulidape on·aha.
A·dok damgnini gisepo so·sojengjeng ong·enggipa biaprango deputy commissioner-rang, Assam-ni deputy commissioner-rang baksa agangrikjringenga ineba Chief Minister parakataha.
So·sojengjeng ong·enggipa sima jolrango tom·tomaniko rakkina gita Superintendent of Police (SP)-rangna dingtangmancha Standard Operating Procedure (SOP)-rangko sorkari on·atmanaha ineba ua aganaha.
Meghalaya a·doko ga·akgipa International border-rangni bidingo janapatskaengon, gipin a·songrang baksa nangchapgipa international border-rango gimik dam 14 police station-rang donga aro Indo-Bangla simarangoba police outpost-rang baksana infiltration check post-rang donga ine Chief Minister talataniko on·angeba, ia jolrango police-rang salantian ja·arangchi re·rurae nirok sandianirangko dakjringenga ine parakataha.
Sima jolrango so·sojengjeng ong·enggipa bangki damdok biaprangko namatna kam ka·gen: CM
Date:
Share post:
