SHILLONG: Sustainable Transport and Efficient Mobility Society (STEMS)-chi bol 30 school bus-rangko watna gita a·dok sorkarini chanchienggipani bidingo Opposition, jajaaniko parakaha, maina a·dok sorkario JNNURM bus-rangni gimin namedake ma·siani dongkuja, jerangkon society-rangna pakwatahachim, aro uarangoni bang·bata bus-rangan natokjahachim.
Question hour-mitingo opposition MLA Charles Pyngrope-ni sing·anina aganchakengon, A·dok sorkari, school bus-rangko nangchongmotgipa dakatjaenga, maina bang·bata school-rangan school bus-rangko jako ra·na gita jechakenga maina uamangni miksonganian skie on·nasan, bus-rangko watna ong·ja, Chief Minister Conrad Sangma aganaha.
Indakeba u·iataha je ia project-na Gong kror 11.30-ko chamanaha aro iana kror 0.17 tangkarangkoba koros ka·manaha.
Indake ia project-ara chu·gimikan A·dok Sorkarini chamgipa ong·a aro sak 30 asongna man·gipa bus-rangko a·dok sorkari salruraatgen.
‘‘Chingni iana kam ka·ani tik ong·srangade ong·kuja, maina iano ma·gipa pagiparangni namnikaniko chingna nanga, unigimin chinga iako dake nichengnasan chanchienga” ine aganan baksa sorkari ia project-ko banoba jakkalchengna nanggen, Pa Sangma aganaha.
Chief Minister indakeba u·iataha je sak 27000 mang chatro chatrirang Laitumkhrah aro Dhanketi-ona re·enga aro 60% chatro-chatrirang private garirango re·enga.
Da·o dipet ge 15 school-rang STEM service-rangko ra·chakna namnikaha.
Charles Pyngrope, indake ku·pattianiko on·aha je Sorkari, BK Bajoria School-onikoba sing·sandie ra·na man·gen jemangan ru·uta bilsirangonin bus service-rangko chalaienga. Unomitingo, STEMS-ni ning·o bus-rangko jakkalanio school-ni maming sko sana nangani dongjawa aro sorkariba ia project-ko tongtongde jakdangdikpaani dongjawa ine Chief Minister talataniko on·aha.
Ua agana, ia bus garirang pringo, attamchibarao chatro chatrirangko salrurana man·gen, aro ia apsan bus-an sorkari emplyee-rangkoba salna man·gen, iana agreba chuttini salrangode Tourism-naba jakkalna gita man·gen, Pa Sangma aganaha.
Naljokaniko on·na gita bus garirango CCTV aro GPS dakgiparang donggen, bi·sarangko naljoke rakkina gita manderangko skie tarigen, CM aganaha.
Unaskang, Congress MLA Saleng Sangma indake aganahachim je, society-rangna bus-rangko pakwatana batede sorkari, bus-rangko school-na pakwatsrangon nambatgenchim, maina society-na on·gipa JNNURM bus-rangko da·oba gale dontokaienga.
Da·o dipet school-rangna bus-rangko pakwatjawa ine tik ka·ade ong·kuja indiba bang·a school-rangan jako ra·na jechakengani gimin, banoniba a·bachenge jako ra·e nichengnasa chanchie nienga ine Chief Minister aganchakaha.
