U·IATTIMGIPAONI
SHILLONG: Chief Minister, Conrad K. Sangma, mijalo 2023-2024 bilsini korosrangna Gong kror 1,592 soknapgija budget-ko parakataha, jean GSDP-ni 3.42 percent mangni gita ong·a.
Da·o ong·enggipa Assembly budget session-o mijalo ia soknapgija budget-o parakatanio aganengon, gimikchi kror 21,781 tangkarangko man·sogen ine chamsoenga, uanoni kror 19,414-ko kajinaoniko aro kror 2,366-ko capital receipts-oniko man·gen ine chamsoenga ine Chief Minister Bristibaro aganaha.
Ra·chakgipa kror 2,339 ko changale chu·gimik man·soanirang kror 19,442 ong·gen ine chamsoenga, CM aganaha.
“Korosni bidingo, chu·gimik korosna kror 22,022 ko anga chamsoenga, uanoni revenue korosna kror 17,186 aro capital expenditure ba mongsonggipa nanggipa bosturangko brena kror 4,836 ko chamsoenga. Loan chotna nanggipa kror 988 ko changale, korosna chu·gimik kor 21,034 ko chamsoenga,” Pa Sangma aganaha.
Chief Minister indakeba taldapataniko on·aha je 2023-24-o interest ba sud gamna nanggipana kror 1,169 ko chamsoenga aro pension-na gamna kror 1,794 ko chamsoenga.
Iana agreba, Pa Sangma aganakua je sabisi sakanchirangchi neng·nikatako man·genchimoba A·dokni economy ba tangka paisani gadang tang·dororoenga, a·doko economy-ni tang·doani 2018-23 ni gisepo 6.75% ong·aha.
“Mongsongbate, mikkang bilsina growth rate-ko 11.5 percent donsoenga. Da·ogita mikkang bilsi 5-na tang·dogenchimode, re·baenggipa 2027-28 mangode A·dokni economy kror 80,000 mangona tang·dogen aro Meghalaya-ko Meghalaya ge·saa 10 Billion-dollar economy-ona sokatgen ine anga ka·dongsoenga,” ua aganaha.
Uni aganani gitade, A·doktangni tax aro non-tax revenue-rangba namemanchan tang·dororoenga.
Ua indakeba parakaha je da·oni financial year-na nipile chamtaiani gitade an·ching an·tangoni tax revenue man·ani kror 2,636-ona sokanggen.
“2023-24-nade, angni chamsoengani gitade an·chingni tax revenue-tangko man·ani 22% mang gapgen aro kror 3,205-ona sokanggen. Iano kror 1,785-de GST-oni, kror 792-de pala-botani bading-chiwalani kajinarangoni aro aro kror 413 excise-oni ong·gen,” Chief Minister u·iataha.
Pa Sangma iakoba u·iatkua je A·doktangni non-tax revenue man·ani ia chang financial year-o kror 590-ona sokanggen ine ka·dongsoenga.
“Batanggimin bilsio kror 525 man·aniko niatgenchimode ian 12.5% nigta bariaha. Ia 2023-24 bilsio, A·doktangni non-tax revenue-ba 26% mangita barigen aro kror 742-ona sokanggen ine anga ka·dongsoenga,” ua parakaha.
Chief Minister agana je 2023-24-na kror 22,022-ko chu·gimik korosna chamsoenga, unoni kror 17,186 ko revenue korona aro kror 4,836-ko capital expenditure-na chamsoenga.
“Anga iakoba parakatna kusi ong·a je, da·o 2023-2024 bilsini korosna chamsogipa, skang 2022-2023-na 14 percent aro 2021-2022 na 38.5 percent bataha,” Pa Sangma parakataha.