U·IATTIMGIPAONI
SHILLONG: Meghalaya a·doko songdongenggipa manderangni aro dingtang dingtang dolrangni nangnikani gita a·dokona niam gri napsrukanirangko champengna cholrangko sandiani ja·manosa Shillong-ona rel garirangko ra·bana kamko ka·gen ine Sukrobar salo, a·dokni Chief Minister Conrad K Sangma parakataha.
“Manderang rel garirangko champengsoengade ong·ja indiba niam gri napsrukbaenggipa manderangnasa kenchaktokenga. Uni gimin chinga niam gri napsrukanirangko champengna cholrangko sandienga,” ine Chief Minister, kobor ra·timgiparangna aganaha.
Niam gri napsrukanirangko champengsona gita Inner Line Permit (ILP)-ko ra·gatanisande chol ong·ja indiba ILP-ko man·genchimode nambatgen ineba Sangma aganaha.
Byrnihat-oba dingtang dingtang neng·nikanirangko sorkari chagrongna nangkuenga aro iani bidingo dingtang dingtang dolrang baksa agangrikkuenga ineba Chief Minister parakataha.
“Bostu salgipa rel garirangko ra·bachengani gimin anga aganmanaha maina ian a·dokni economy-ko tang·doatan baksana game ge·e cha·giparangnaba namgni ong·gen. Indake ong·genchimoba chingni a·bachengo aganmangimin gitan chinga rel garirangko ra·bana skang dingtang dingtang dolrang baksa agangrikchenggen,” ine Sangma aganaha.
Rel garirangko ra·baani bidingo ua Union Railways Minister baksa agangrikmanaha ine janapatengon, a·songni namgnina dingtang dingtang a·dokni skotong songjinmarangko rel ramarangchi nangdimatna gita a·songni Prime Minister Narendra Modi nangnikenga ine Chief Minister parakataha.
A·dok damantian dingtang dingtang neng·nikanirang donga ine janapatengon, Meghalaya a·dokoba dingtang dingtang dolrang aro dingtang dingtang jatko dilgiparang, rel garirangko ra·baanichi niam gri napsrukanirangna kenchakaniko paraktokaha ine Sangma aganaha.
Shillong-ona rel ramarangko taribana gita da·o dipet a·dok sorkari, KHADC-ni NOC-ko man·soa dongkuja ineba Chief Minister parakataha.
