U·IATTIMGIPAONI
SHILLONG: Sukrobar salo, Meghalaya Legislative Assembly-ni Session-ko bakrodapatjahani gimin Trinamool Congress (TMC)-ni dilgipa Mukul Sangma, suk ong·gijaniko parakatahaon, niamo pangchakesa ia salna session-ko dontongataha ine a·dokni Chief Minister Conrad K Sangma, talataniko on·angskaaha.
Chief Minister-ni parakatani gitade, Assembly-ni niamrango pangchakesa Sukrobar salo session-ko dontongataiahachim.
Iani bidingo kobor ra·timgipa manderang baksa agangrikengon, Sukrobar salo Assembly, pring 10:00 bajioni sal 12:00 bajiona kam ka·gen ine Rule Book-on tale janapani gnangchim ine Sangma parakataha.
Opposition-o asongenggipa membor-rang an·tangtangan niamrangni gimin janaptaitaie niamko ja·rikchina aganaha aro Assembly Speaker-ba ukon dakenga ineba Chief Minister aganaha.
Somoiko bang·rodapatjahani gimin opposition membor-rang suk ong·niktokjaenga ine sing·anina aganchakaniko on·angskaengon, advisory committee-ni tik ka·gimin gitasa somoikode sualenga ine Sangma parakataha.
Governor-ni aganprakgipani bidingo jera ra·grikanio, budget-ni gimin jera ra·grikanio, special motion-rango aro kan·dike chanchirimanirangoba membor-rang an·tangtangni nangnikanirangko aganna man·aigen ineba Chief Minister parakataha.
“Chinga membor-rangni ra·baenggipa kamrangni gimin pangnan chanchirimenga aro maming dakeba uamangni sing·anirangna aganchakgija ong·jaenga. Mikkangchiba chinga je kamni giminba chanchirimna kusi ong·aigen aro maming dakeba kate chakjawa,” ine Sangma aganaha.