U·IATTIMGIPAONI
SHILLONG: Meghalaya a·doko Roster System-ko ra·gatani a·sel Khasi aro Jaintia Hills a·jarango kamgri ong·e dongenggipa chadamberang neng·nikanirangko chagrongna nangtokenga ine matnangenba, iani bidingo ramarango jingjengatanirangko dakna gita Sukrobar salo, Voice of the People’s Party (VPP) tik ka·angaha.
Iani bidingo kobor ra·timgipa manderang baksa agangrikengon, Roster System-ni gimin uamang Assembly-ni session-o jera ra·na miksongachim indiba sorkari uamangna cholko on·jaengani gimin jingjengatana agrede gipin cholrang dongjaha ine VPP-ni president Ardent Miller Basaiawmoit parakataha.
“Ia nangchongmotgipa kamni bidingo chinga chadamberang baksa aro a·doko songdongenggipa manderang baksa chanchirimgen. Roster system-ko ra·gatanichi chinga chadamberangni neng·nikanirangko nie dongna man·jawa,” ine Sukrobar salo, opposition membor-rangni nangnikanirangko sing·chenggija Assembly-ni Speaker Thomas A Sangma, session-ko dontongataiahani gimin Basaiawmoit, an·tangni suk ong·gijaniko parakataha.
Session-ko dongimin somoi gitan dontonggenma ma somoiko ra·dodapna nangnikgenma, iako Assembly-ni Speaker, opposition membor-rangonikoba sing·chengna nangachim ineba VPP president parakataha.
Basaiawmoit-ni parakatani gitade, skanggipa changna Assembly-ni budget session-ko salsnina ong·ate private membor-rangni kamna salgnikosan somoi on·aiahachim.
Governor-ni aganprakgipani gimin jera ra·grikna gita minute 10-mangmang somoiko membor-rangna on·aniara namen ra·chakna man·gijani ong·aha ineba ua aganaha.
Neng·nikanirangko man·enggipa manderangni gimin aro a·dokni nanganirangni gimin MLA-rang, bang·en aganna nanganirang dongkuengachim ineba Basaiawmoit parakataha.
Assembly-o roster system-ni gimin chanchirimna somoiko on·janiara a·dok sorkarini daitotangoni katna jotton ka·aniko mesokanisa ong·enga ineba VPP-ni president matnangataha.
