U·IATTIMGIPAONI
Shillong: Mawkyrwat-oni UDP MLA Renikton Lyngdoh Tongkhar, roster system-ko changgipin session-ona chanchirimna ra·angna gita Assembly-ni Speaker Thomas A Sangma-na chittiko segen ine aganaha.
“Sombar salo, roster system-ni motion-ko changgipin session-ona ra·agnna mol·mole segipa chittiko on·gen’ ine Tongkar aganaha.
Assembly Speaker-ni House-ni sittingko ba somoiko bakroatjani gimin bang·a memborrangan suk ong·gijaniko paraktokaha.
“Sukrobar salo Assembly-ni niam gita session-ko somoiko bakkandikataha, indiba Assembly Speaker, somoiko bakrodapatna bil dongachim, ine UDP MLA aganaha.
Indake ong·engon Tongkhar, ia mamlao Chief Minister Conrad Sangma-ko gronge agangrikangaha.
“Roster system-ko district level-o ra·gatchina CM-ko mol·molaha. Batanggimin sal somoirango district-o kamna mande ra·anio reservation policy-ni niamrangko ja·rikjaha. Policy-kosan ra·gate donaha.”
Indake Tongkhar, chadamberangko, ka·donge dongchina didiangaha.
Minggipin Voice of People Party (VPP), Meghalaya a·doko roster system-ko ra·gatanio Khasi aro Jaintia Hills-ni chadamberangna nangchakaha, iani gimin ramao ong·kate jegalna parakataha.
Assembly-o roster system-ni gimin chanchirimna sorkari, maming cholkon on·jaenga, uni gimin chingo gipin chol dongjaha ine VPP president Ardent Miller Basaiawmoit aganaha.