U·IATTIMGIPAONI
SHILLONG: India a·songni salgro salaram a·dokrango Armed Forces Special Powers Act (AFSPA)-ko chu·gimik ra·galsrangchina gita dingtang dingtang dolrang dabitokengon, Assam, Nagaland aro Manipur a·dokrango AFSPA-ko komiatna gita ma·mong sorkari parakatahani gimin Meghalaya a·dokni Chief Minister Conrad K Sangma-ba ma·mong sorkariko mittelpilaniko parakataha.
Salgro salaram a·dokrango AFSPA-ko chu·gimik ra·galchina dingtang dingtang dolrang baksana a·dok sorkarirang dabitokengon, so·sojengjeng ong·batenggipa Assam, Nagaland aro Manipur a·dokrangoni mitam biaprango AFSPA-ko ra·galna gita Sonibar salo, Union Home Minister Amit Shah parakatahachim.
Indake ong·engon, salgro salaram a·dokrango AFSPA-ko komiatna gita ma·mong sorkarini parakatanina Meghalaya a·dokni Chief Minister Conrad K Sangma-ba ma·mong sorkariko mittelpilangenba, bakan salgro salaram a·dokrango ra·gatgipa AFSPA-ko chu·gimik ra·galgnok ine an·tangni ka·dongchakenganiko parakataha.
Meghalaya a·doko North East Students Organisation (NESO)-ni bak ong·paenggipa mitam dolrangba, salgro salaram a·dokrango AFSPA-ko chu·gimik ra·galsrangchina gita dabitokengachim ine nikna man·a.
“AFSPA-ara salgro salaramni Tribal manderangna mande ra·gijaniko mesokani gitasa ong·a. Salgro salaramni pilak a·dokrangonikon AFSPA-ko chu·gimik ra·galsrangchina chinga dabienga,” ine Robibar salo, KSU-ni president Lambokstar Marngar parakataha.
AFSPA-ni pal salgro salaramni pilak a·dokrangon Inner Line Permit (ILP)-ko ra·gatna nanga ineba KSU-ni president dabiangaha.
