SHILLONG: Meghalaya a·doko VIP-ni gadang dongja aro Ministry of Home Affairs-ni dongimin niamrango pangchakesa nanggipa manderangna security ba chel·chakgiparangko on·enga ine Sombar salo, a·dokni Chief Minister Conrad K Sangma parakataha.
Garirango rong donggipa ba andalatgipa glass chataniko champengna Supreme Court-ni on·gimin niamrangko sorkari ja·rikenga ine janapatengon, banoba manderangni VIP-rang gita dake mesokaniko nikgenchimode sorkarina u·iatchina gita ua, Assembly-ni membor-rangko didiataha.
Meghalaya a·doko VIP-rang gita dake an·tangtangko mesokenggipa manderangni kosako maidakgipa ja·kurangko sorkari de·enga ine Assembly-o VPP MLA Ardent Miller Basaiawmoit-ni sing·anina a·dokni Chief Minister, ia kattarangko aganchakaha.
Iani bidingo sorkariko sing·doangengon, bilo ong·gipa manderangni ripengska ba ma·drangrang ba bading chiwalrimskagipa mitam manderang, iandakgipa cholrangko ra·e an·tangtangko VIP-rang gita mesokenga aro ian manderangni nikanio namen nitogijani ong·enga ine Basaiawmoit parakataha.
“Batanggimin bilsibri bilsibongamangni gisepo bang·a manderangan, garirango andalatgipa glassrangko chate aro registration donggijagipa garirangko jakkale, an·tangtangko VIP-rang gita mesoktokenga. Mitam garirangode VIP siren-rangkoba gam·atkuenga,” ine VPP MLA aganaha.
Basaiawmoit-ni aganani gitade, garirango iandake andalatgipa glass-rangko teke jakkalna man·engani a·selan dos dakgipa manderangba police-rangoni joke katna man·enga aro ma·manti ong·gija dakgipa kamrangko ka·na man·rongengachim.
Ia kattarangna a·dokni Chief Minister aganchakaniko on·angengon, Supreme Court-ni on·gimin pilak niamrangkon sorkari ja·rikenga ine parakataha.
“Anga an·tangni garimangmangoba andalatgipa glass-ko teke jakkalja aro jeko chinga manderangna aganenga uko an·tangtangba ja·rikna jotton ka·enga. Banoba niam pe·giparangko rim·a man·genchimode uandakgipa manderangni kosako sorkari rakgipa ja·kurangko de·enga,” ine Sangma aganaha.
Meghalaya sorkari VIP-rangko bak dakani ba gadang donani dongja ineba Chief Minister parakataha.
“Indake ong·genchimode nangchongmotgipa manderangnade chinga Home Affairs Ministry-ni dongimin niam gita Z plus, Z, Y plus, Y aro X category-rangko dona,” ine Sangma talataniko on·angaha.
