SHILLONG: Reservation policy-ni bidingo Roster system-ko ra·gatkujachina gita Sombar salo, Voice of the People’s Party (VPP)-ni MLA Ardent Miller Basaiawmoit, a·dok sorkariko didiangaha.
“Chinga roster system-ode maming neng·nikanirang dongja indiba reservation policy-osa suk ong·jaengani gimin roster system-ko ra·gatgija donchengchina chinga nangnikenga. Chinga darangkoba onchepna sikjaengani gimin sorkari nambata niamrangko ra·gatchengchina,” ine Sombar salo Basaiawmoit, Assembly-ni chanchirimanio bak ra·angpaengmiting somoio aganaha.
VPP MLA-ni aganani gitade, office memorandum-rangchi reservation policy-ko changchet ba chang chikkingmangde dingtangatahachim.
Reservation policy-ko dingtangatanio gipin biaprangoni manderangba namgnirangko man·pana gita cholrangko on·aha aro iano be·enni gita cholgri ong·gipa manderangna maming cholrangko on·ani dongjaha ineba Basaiawmoit parakataha.
“Batanggimin somoirango jatgnini dilgiparangan apsan ku·mong nangrime a·dokko ong·atna man·aha ong·ode maini gimin ia sal somoirang jatgnini dilgiparang apsan asonge nambata niamrangko bikotna chanchirimna man·jaenga? An·tangtangni namgnina chanchiaigipa manderangna chinga iano biapko on·na man·jawaha,” ine VPP MLA aganaha.
Reservation policy-o Khasi-Jaintia-rangna 40%, Garorangna 40% aro gipinrangna 20%-ko kangna tik ka·aniara pagitcham ma·gitchamrangni chanchichenggija aro sikkele kam ka·aniko mesokani ong·aha ineba Basaiawmoit parakataha.
Uni aganani gitade, ia songgigrikaniko Khasi dilgiparangni ra·chakaniara, dingtang a·dokko man·jana kene ra·chakanisa ong·ahakon ineba ua chanchichipenga.
Ia reservation policy-ko sualanio a·dokni pagitchamrang manderangni jelbra jelsuanikoba name nichengjaha gita nika ineba ua aganaha.
Khasi aro Garorangni gisepo mande jelbra jelsuanio dingtanggrikaniko janapatengon, 1971 bilsio Khasirangni jelbra jelsuaniara 4,57,064 ong·achim aro ua somoio Garorangni jelbra jelsuaniara 3,20,613-san ong·skaaiachim ine VPP president parakataha.
“Iako percentage-ona hisapatgenchimode Khasirang 45% aro Garorang 30%-san ong·aiachim,” ine Basaiawmoit aganaha.
