TURA: Adita antirangna skang, West Garo Hills a·jani Chibinang jolo man·gipa balgitchak mangsani siani a·selko West Garo Hills-ni Wildlife department sandirokanggen ine u·iataha.
Koborko on·ani gitade, ia balgitchakko GHADC-ni forest official-rang, Phulbari jolo donggipa Chibinang songoniko jokatna man·ahachim aro balgitchakko Wildlife official-rangni jako pakwatatna skangan saknaanirangko man·ahachim.
Ia balgitchakko ja·mano Tura-ona ra·bae, manggipin balgitchak baksa chipdime donahachim indiba ia balgitchak, March-ni 27 tarik Sombar salo siangahachim.
Iani bidingo kobor ra·timgiparangna talataniko on·angengon, ia balgitchakko Chibinang songo donengmiting somoion manderangko nike kenjagokahakon aro iani giminsa Wildlife-na pakwatatani ja·man mikmalatpilna gita manggipin balgitchak baksa chipe donahachim ine Wildlife department-ni DFO Rupankar Marak parakataha.
Indake ong·engon, ia balgitchak Sombar attamo siangaha aro department-ni manderang ia balgitchakni siani a·selko am·sandina gita ua biapona re·angaha ine DFO parakataha.
Ia balgitchakni siani a·selko talbate ma·sina gita Mongolbar salo ia balgitchakko rate nigen ineba ua parakataha.
