SHILLONG: 2021 bilsini August 13 tarik pringwalo, Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko so·ote galchina gita sawa police-rangna ge·etaniko on·aha ine Mongolbar salo, Voice of the People’s Party (VPP)-ni MLA Ardent Miller Basaiawmoit, a·dok sorkariko sing·doangaha.
“Ge·etaniko man·jagenchimode darang police-rangan mandeko so·otna pa·jawachim ine anga an·tangde bebera·a. Iani bidingo dosgri mandeko sandijachina ba sorkarini ge·etaniko maniaigipa mandeko potchrake dos galjachina anga mol·molenga,” ine Assembly budget session-ni bon·kamgipa salo, Basaiawmoit aganaha.
Ian bilo ong·enggipa manderangni chu·sokgijaniko mesokani ong·a ine janapatengon, ia a·selni bidingo sorkari kakket bichalko ra·bana nangchongmota ine VPP MLA dabiangaha.
“An·chirangde MDA 1.0 sorkarini jakon ong·a aro iako an·ching gisik ra·na nanga,” ine Basaiawmoit aganaha.
HNLC aro ANVC bobil dolrangni bilakengmiting somoirangon a·doko bobil dake chakataniko bon·atna man·ahani gimin ua police department-ni kamo chu·gimik ka·dongchakenga ineba Basaiawmoit parakataha.
“A·doko tom·tomaniko ra·bapilna man·gipa apsan police-rang, HNLC-ni gitcham general secretary-ko sae palango tue dongmitingko rim·na man·jaha ine agananikode anga bebera·na man·jawa,” ineba VPP MLA aganaha.
Namgipa kamrangna medal-rangko man·pilgipa police-rang, Thangkhiew-ko tange rim·na man·jaha inako darangba bebera·na man·jawa ineba Basaiawmoit parakataha.
2021 bilsini August 13 tarik pringwalni 3:00 bajimango HNLC-ni gitcham dilgipako rim·na uni nokona re·anggipa tactical team, chanchigija aro nangana bate bilko jakkale kamko ka·ahani a·selsa HNLC-ni gitcham general secretary Thangkhiew sina gita nangaha ine gitcham Justice T Vaiphei-ni report on·gipani giminba VPP-ni MLA parakataha.
Justice Vaiphei-ni report-ko on·ani ja·man sorkari mai dakgipa ja·kurangko de·aha ineba Basaiawmoit sing·doangaha.