SHILLONG: Sohiong Assembly Constituency-ni election-ko re·baenggipa May jani 10 tariko ong·atanggen ine Budbar salo Election Commission of India (ECI) parakataha.
Meghalaya Legislative Assembly election-ko re·anggipa February 27 tariko ong·atahaoba, re·anggipa February-ni 20 tariko, a·dokni gitcham home minister aro United Democratic Party (UDP)-ni candidate HDR Lyngdoh, tanggitik ka·tong saaniko man·e siangahani gimin Sohiong constituency-ode MLA election-ko gipin constituency-rang baksa apsan ong·atjahachim ine nikna man·a.
Indake ong·engon, Sohiong Assembly constituency-ni election-koba damgittam a·dokrango ong·atenggipa gipin dambri Assembly constituency-rang baksa apsan ong·atanggen ine Budbar salo ECI parakataha.
Iani bidingo u·iataniko on·angengon, pu·onaniko May 10 tariko dakanggen aro counting ba channaniko May 13 tariko dakangskagen ine a·dokni Chief Electoral Officer (CEO) FR Kharkongor parakataha.
Sohiong Assembly election-na gazetted notification-ko April 13 tariko on·gen ine parakatengon, nomination file ka·ani bon·kamgipa tarikara April-ni 20, Scrutiny ka·ani tarikara April-ni 21 aro nomination-rangko ra·pilani bon·kamgipa tarikara April-ni 24 tarik ong·gen ine a·dokni CEO parakataha.
Sohiong Assembly election-ni tarikko parakatahani gimin ia constituency-ni ning·o donggipa pilak biaprangon Model Code of Conduct (MCC)-ko ra·gatanggnok ineba Kharkongor parakataha.
Indake ong·engon, ia Sohiong Assembly election-na United Democratic Party (UDP)-ni gita HDR Lyngdoh sagini grigipa Synsharlang Kupar Lyngdoh Thabah-ko candidate dake adita salrangna skangsan parakatmanahachim.
Ia election-o ua, NPP-ni candidate aro gitcham minister Samlin Malngiang aro gipin candidate-rang baksa susagriknasienga.
