SHILLONG: Kamoni dontongata man·gipa a·dokni police officer GK Iangrai-ni kosako ka·gipa mingdok case-rangko District & Session Court, jamin watani ja·man Bristibar walo uko, Shillong District jail-oniko jakgitel watpilaha.
Iani bidingko kobor ra·timgipa manderang baksa agangrikengon, GK Iangrai-ko rim·anio skanggipa case-ara Shillong-o Nationwide Emergency Response System (NERS) building-ko rikanio nangchakegipa case ong·achim ine Sukrobar salo, Iangrai-ni ukil P Yobin parakataha.
Yobin-ni parakatani gitade, uni ja·man Iangrai-ko ration-rangko supply ka·anina aro uni ja·man COVID-19-na garirangko supply ka·anina rim·ahachim.
Uni ja·man ia police officer-ni kosako CID, minggittam case-rangko ka·dapenba arrest warrant-na District & Session Court-o bi·aha ine Iangrai-ni ukil parakataha.
“Ia pilak case-rangni kosako chinga anicipatory bail-na dorgastorangko on·na man·aha aro uandaken Budbar salo uni minggni case-rangna aro Bristibar saloba mingsa case-na kachari jaminko on·aha. Minggni case-rangnade una skangan jaminko on·ahachim,” ine Yobin parakataha.
Indake ong·engon da·o ua be·en an·sengjaengani gimin hospital-o sanna bananiko ra·enga ineba Iangrai-ni ukil parakataha.
Shillong-o Nationwide Emergency Response System (NERS) building-ko rikna gita chame on·gipa tangka paisarangko jakkalsreta ine matnange, re·anggipa October 28 tariko saksa Darwin Sangma minggipa mandeni CID-na FIR ka·ani ja·man Iangrai-ko November 2 tariko rim·ahachim.
Indake ong·genchimoba an·tangni kosako matnanganirangko ua jegalatskaenba, police department-o ong·gija dakgipa manderang bang·en donga aro gipinrangni ong·gija kamrangna ukosa matnange rim·aha ine gitcham AIG parakatskaaha.
Iani bidingo ua bang·en RTI-rangkoba ka·aha aro ia RTI-rangan police department-o ong·gija dakanirangko parakgen ineba Iangrai parakataha.
2021 bilsini August jao HNLC bobil dolni gitcham general secretary Cheristerfield Thangkhiew-ko so·otanio jak donggipa apsan police officer-rangan uko rim·na chalakki dakanioba jak donga aro iani a·selan una aro uni nokdangnaba kenchakna nangani ong·enga ineba Iangrai, adita salrangna skangsan parakatahachim.