SHILLONG: State BJP, Lok Sabha election-o Shillong Tura seat ge·gnion susaana tanrienga aro candidate-rangni gimin knal Sombar salo chanchigen.
Iako koborko State BJP chief, Ernest Mawrie u·iatao, party-ni ma·mongni dilgipa Lok Sabha seat-rangko bang·en chena uandake salgro-salaram a·jolo party-ko bilakbatatna aroba namroro-silroroaniko ra·bana miksongenga ine aganaha.
Jemangan MLA gitchamrang ong·a uamangoni mitamko Lok Sabha election-rango susaatna party-ni chanchiani sak bri ba sak bonga candidate-rang donga, ua aganaha.
BJP National Secretary aro North East in-charge, Rituraj Sinha, candidate-rangko parakatani meeting-o dongpagen aro candidate-rangni bimingrangkoba tik ka·naba donga, ua aganaha.
Ru·utgija salo matchotgipa Assembly election-rango ge 59 constituency-rangoni ge·gnisan seat-rangko man·genchimoba party watgrikaniko dakja, Lok Sabha election-rang Assembly election-rangoni namen dingtanggrika aro Delhi-o sawa bilo ong·enga aro ukosa manderang nibata aro namroro-silroroanina puongen, ua agandapaha.
Polling booth committee-ko bilakbatatna a·doko kam ka·giparang kamrangko ka·na a·bachengaha aro kamrangko bilakbate ka·angna Guwahati-o salgro-salaram a·jol gimikni BJP a·dokni dilgiparangni ru·utgija salo ong·atgipa meeting baksa aro Lok Sabha election-rango bang·e seat-rangko chena re·mikkangani gimin joljol chanchiangaha.
