SHILLONG: Re·anggipa bilsio West Jaintia Hills a·jani Mukroh songo ong·anggipa a·selni gimin, seachi sakki on·gipa manderangoniko ku·sikchi sakki on·anikoba Justice (retd) T Vaiphei-chi sandirokenggipa inquiry commission ra·na nangnikenga.
Inquiry commission-ni order-o parakani gitade, ia a·selni bidingo Mukroh songni saksku manderang, chong·motan Daman Bhoi, Paitlang Sumer, Bud Sumer, Plan Bhoi, Klan Phawa, Ploda Sumer, Riskem Myertem, Nitawan Dkhar aro Rilis Nartiang, seachi sakkirangko on·manahachim. Ia saksku manderangoni, Klan Phawa, Ploda Sumer, Riskem Myertem, Nitawan Dkhar aro Rilis Nartiang-de a·sel ong·anio sianggipa manderangni nokdangrangoni ong·achim.
Meghalaya aro Assam-ni DGP-rangko man·chape, PCCF aro Assam Forest Force-ni Head baksana jolni MDC, songni dilgipa aro kosako janapgimin songni manderangoniko sing·sandion, dolgnini gisepo matnanggrikanirangko aro dolsa dolgipinni kosako dos galgrikanirangko nikna man·ahani gimin uamangni see on·anichide sakkirangko chu·onge man·jaha ine commission parakaha.
Re·baenggipa April 14 tarikni pring 11:30 bajio an·tangan ba uni official-rangchi sakkirangko commission building-ona rimbachina gitaba Inquiry Commission, Meghalaya a·dokni DGP LR Bishnoi-na ge·etaniko on·ataha.
Sakkirangko April-ni 14 tariko sing·sandina man·jagenchimode maming u·iatdapani gri April-ni 15 tariko sing·sandiangkugen ineba Commission u·iataha.
“Ia sakkirangko Assam-ni DGP aro Assam-ni PCCF baksana HF ba uamangni ukilrangba sing·sandina man·gen,” ine Justice (Retd) Vaiphei-ni Inquiry Commission parakataha.
Re·anggipa 2022 bilsini November 22 tariko, Mukroh songo a·sel ong·anichi Meghalaya a·dokni sakbonga manderang aro Assam-ni Forest guard saksa so·otako man·ahani gimin ia a·selni bidingo sandirokna gita ia inquiry commission-ko a·dok sorkari songe on·angahachim ine nikna man·a.