SHILLONG: Meghalaya Legislative Assembly-o da·onan Opposition-ko dilna gita dilgipako seokkujaengon, Opposition dolni dilgipa gri Assembly-ko chalaiengani gimin Assembly-ni gitcham Speaker Bindo Mathew Lanong sing·doataha.
“Opposition-ko dilgipade dongna nanga ong·jaode maikai Assembly-ko chalaigen?” ine Lanong sing·doataha.
Vote-rang pripraahani a·selsa Opposition-ni dilgipa dongjaenga ine Law Minister Ampareen Lyngdoh-ni agangipani gimin janapatengon, je ong·genchimoba opposition-ni dilgipade dongna nanga ine Lanong parakataha.
Ia pilakan Speaker-ni skaniosa ong·aignok ineba ua aganaha.
Opposition-o ong·enggipa dolgittaman da·o dipet apsan bakrimjaengani gimin ia sing·anide ong·kattelgen ine adita salrangna skangsan a·dokni Law Minister Ampareen Lyngdoh parakatahachim.
Lyngdoh-ni aganani gitade, iandakgipa obostako gipin a·dokrangoba nikmanaha aro ian ong·ronggijani katta dongja.
Indake ong·engon, batanggimin somoirango gitcham Speaker-rang maikai iandakgipa obostao ja·kurangko de·ahachim, apsan dakgipa ja·kurangko da·o ong·enggipa Speaker-ba de·na man·gen ine Lanong parakatskaaha.
Assembly-ni dongimin niam gitade, opposition-ni dilgipa ong·na gita opposition dolo komibeoba sak 10 membor-rang dongna nanga aro da·o dipet Congress, TMC aro VPP dolgittaman bakrimskakujaengachim.
