TURA: Bristibar salo, National Cadet Corps (NCC) Directorate, North Eastern Region-ni Additional Director General (ADG) Major General Gagan Deep, skanggipa changna Garo Hills-ona re·bae, NCC-ni cadet-rang baksa Tura-ni Don Bosco College-o tom·aniko ong·atangaha.
Garo Hills-o NCC-ni kamrangko apalbatatna gita cholrangko nina ua Garo Hills-ona re·baaha ine u·iataha.
NCC-ni ADG baksana 41 Megh Battalion NCC-ni Colonel SJ Sander aro gipin official-rangba dongpaa aro ia tom·anio Major General Gagan Deep, jinmana aganprakangengon, NCC ANO-rangna dakchakaniko on·na gita NCC NER-ni miksonganirangko agan-talate on·angaha.
NCC cadet-rangna skill training-rangko on·na gita IIM Shillong aro NIFT Shillong gita dakgipa institute-rang baksa bakrimna miksongengani giminba ua aganangaha.
Garo Hills-o NCC-ni kamrangko tang·doatna gita an·tangtangko on·kange kamko ka·engani gimin ua dingtang dingtang skul aro college-ni NCC-rangkoba mittelpilangaha.
Ia tom·anio Don Bosco College aro Tura Govt College-ni sak 75-mangni gita NCC cadet-rang bakko ra·e NCC-ni ADG baksa agan-golpogrikna cholrangko man·rikaha.
