SHILLONG: A·gilsakko watanggipa a·dokni gitcham home minister HDR Lyngdoh sagi aro uni gritang Synshar Lyngdoh Thabah-na manderangmi ka·saaniko nikmanahani gimin re·baenggipa May jani 10 tariko ong·atna sienggipa Sohiong Assembly election-ko United Democratic Party (UDP) chena ka·dongenga ine UDP-ni general secretary Jemino Mawthoh parakataha.
Sohiong Assembly election-na UDP rakbee kamrangko ka·soenga aro ia election-ko chena gita cholrang nambatenga ineba ua parakataha.
“Gitcham home minister HDR Lyngdoh sagini gritang Synshar Lyngdoh Thabah-ko UDP-ni candidate-na biming mingani somoion chinga manderangni ka·saanirangko nikmanahani gimin ia changode chinga nambate dakna ka·dongenga,” ine UDP-ni general secretary aganaha.
UDP-ni candidate aro a·dokni gitcham home minister HDR Lyngdoh, February-ni 27 tariko ong·atanggipa Assembly election-na skang siangahani gimin Sohiong Assembly constituency-ni election-ko May jani 10 tariko ong·atskana siengachim.
Sohiong Assembly election-na UDP-ni tarisamsoenggipani bidingo janapatengon, “Gipin constituency-rango chinga NPP-na kenna gita nangachim indiba Sohiong constituency-ode chinga nambate dakgen aro ia election-ko chinga chena ka·dongenga,” ine UDP-ni general secretary Jemino Mawthoh parakataha.
“Vote man·aniko nisusagenchimode dolgnini gisepo inditana dingtanggrikani dongja aro iani giminsa Sohiong-o UDP nambate dakna ka·dongenga,” ine ua aganaha.
Sohiong-o gitcham MLA HDR Lyngdoh-ko manderang namniktokani gimin UDP-na cholrang nambatenga ineba Mawthoh aganaha.
“Ua (HDR) ru·utbea bilsirangna Sohiong-ni MLA ong·angaha aro constituency-ni manderang una ka·satokachim. Ua bilsi 30-mangna Congress-o ong·ani ja·man UDP-o napskana tik ka·aha aro chinga uko chegipa ong·telgen ine ka·dongengachim indiba rasong grie ua a·gilsakko watangna nangaha,” ine UDP-ni general secretary parakataha.
Re·baenggipa 2024 bilsio ong·atna sienggipa KHADC aro JHADC election-ni gimin janapatskaengon, Meghalaya a·doko UDP-an dal·batsranggipa aro gitchambatsranggipa regional party-rangoni dolsa ong·enga aro 2023 bilsini Assembly election-oba dam 11 seat-rangko chee chu·sokgipa ong·ahani gimin district council election-oba name dakna ka·dongsoenga ine Mawthoh parakataha.