NHIDCL-ni bang·bata project-rangan matchotchipkujaenga

SHILLONG: Meghalaya a·doko gong kror 3800-na baten rama tariani kamrangko NHIDCL jako ra·e ka·engoba ia kamrangoni mingsakomangba da·o matchotatna man·kujaenga ine kobor on·aha.

Kobor on·timgiparangni u·iatani gitade, Meghalaya a·doko ming 12-mangni gita rama tariani kamrangko jako ra·e ka·enga aro ia kamrangoni bang·batan da·o dongimin somoi batahaoba kamrangkode matchotchipskakujaengachim.

NHIDCL-ni jako ra·e ka·enggipa kamrangoni Ranikor-Nonghyllam-Maheshkola-Baghmara (Package-I)-ni kamrang da·o 80 percent matchotaha aro unbaksana Ranikor-Maheshkola-Baghmara ramao Rongara-oni Panda-ona (Package 5)-ko tariani 70 percent matchotaha.

Indake ong·genchimoba, gipin kamrang jekai Nongjri (Design Ch. 30.00km)-oni Maheshkola (Design Ch. 55.525km) [R-M-B Package 2 on SH-4 section of Ranikor-Maheshkola-Baghmara Project-ni kamrangde 6 percent-ni gitasan matchotengkua.

Apsan daken, Panda (Design Ch. 112.300 km)-oni Baghmara (Design Ch. 129.385km) [R-M-B Package VI]-ona tarienggipa kamrangba da·o dipet 15.53-mangni gitasan matchotengkua ine kobor on·aha.

Nongstoin-Rambrai-Kyrshai ramaoni Meghalaya-Assam simaona taridapenggipa ramakoba da·o dipet 40 percent-mangni gitasan matchotengkua aro Tura-Dalu ramako tarianiba 53.22 percent-ni gitasan matchotengkua ine kobor on·timgiparang parakataha.

Indake ong·engon, Shillong-Dawki ramako ta·raken matchotatna nangnikengani gimin NHIDCL-ni kamrangko Meghalaya High Court, nirikkienga ineba kobor on·aha.