SHILLONG: Meghalaya a·dokni Reservation Policy-ko 1972 bilsi dipet a·bachengataoni bilsi 10-prakon nipiltaina nangani ong·achim indiba Reservation Policy-ko nipiltaia dongjaha ine United Democratic Party (UDP)-ni general secretary Jemino Mawthoh parakataha.
Reservation policy-ni roster system-ni gimin janapatskaengon, roster system-ko a·doko songdongenggipa pilak manderangan ra·chakna man·na gitasa tarina nangenga ine Mawthoh parakataha.
“An·ching pilakan apsan a·dokni manderangan ong·a aro a·doko songdongenggipa jatgittaman bak rengsiko man·pana nanggiparang ong·a. Uni gimin a·dokni reservation policy aro roster system-ko pilakan ra·chakna man·na gitasa cholko sandina nanga,” ine ua aganaha.
Mawthoh-ni parakatani gitade, Meghalaya a·dokko 1972 bilsio man·chengaonin sorkarini kamrangko Garorangna 40 percent aro Khasi-Jaintiarangna 40 percent ka·e on·enga indiba mande jelbra jelsuaniode Garorangna bate Khasi-Jaintia-rang bang·batachim.
“Ia roster system-ko batanggimin somoiko nipilede tarijachina aro mikkangchinikosa nie tarichina bang·a manderangan ku·pattienga. Indiba darang jatni gisepo maming ma·sisretgrikani aro mikkang niteani dongjana gita pilak jatni dilgiparangan apsan tom·e nambata cholrangko nichina anga an·tangde nangnikenga,” ine UDP-ni general secretary parakataha.
Meghalaya a·doko songdongenggipa pilak jatrangan a·dokni bakan ong·ani gimin pilakni gitan name nichengesa ja·kuko de·na nanga ineba Mawthoh parakataha.
