SHILLONG: Indian Army-ni Eastern Command ning·o donggipa Headquarters 101 Area-ni diamond jubilee-ko maniani bak gita ong·atenggipa ‘Rhino Riders’-ni motorcycle rally-ko re·anggipa Robibar salo, Meghalaya a·dokni Governor Phagu Chauhan, Shillong songjinmao donggipa Rhino Training Complex-o a·bachengate on·angaha.
Ia motrocycle rally-ko a·bachengate on·angani somoio a·dokni Governor, jinmana aganprakangengon, Headquarters 101 Area-ni kamrangna mittelpilangenba, ia motorcycle rally-ko namao chu·sokgipa ong·atchina an·tangni namgipa skaniko parakataha.
1971 bilsini December 16 tariko ia 101 Area dolan, India a·songni sipai dolrangoni Dacca songjinmao napchenggipa ong·e Bangladesh a·songko jakgitelatna dakgrikanio mongsonggipa kamko ka·gipa gita ong·aha ineba Chauhan aganaha.
Ia motorcycle rally-ko Hq 101 Area-ni Col Pankaj Chaturvedi dilangenga aro uamang, Meghalaya, Assam, Mizoram, Manipur, Nagaland aro Arunachal Pradesh a·dokrang gita motorcycle-rango re·jomangenga.
